Diphupar Naga Students’ Union-i 24buba Conference agiogo

Dimapur, Mongputeni/October 12 (TYO): Tanü Local Ground, Diphupar Village nung Diphupar Naga Students’ Union (DNSU)-i 24buba biennial General Conference “Exploring alternatives” omen nung ajemdaker agiogo, ta tanü DNSU Tir, Kumlamo Patton aser Education & Statistics Secy, Kuvi Assumi nati sangdong ka ajanga metetdaktsü.
Sentong tetenzükji tetushi tejaoker Rural Development, Govt. of Nagaland Advisor, Dr Neikiesalie Nicky Kire-i tenzükja liasü; iba mapang nung pai Union indang wako salatsü aser DNSU Biennial Journal tanabuba edition sayatsü.
“Exploring alternatives” omen nung jembidang Kire-i alima tzü-mopung atema khuret abentsü ayongzük aser pei kidang tajemba agia süngdong 10 bosa atemtsü atema tenangzükba agitsü ajungshia liasü.
Paisa, ‘süngdong kwi mesüi intetter’ ibaji kanga tongtibang, ta ashi.
Asen lima junga anepalu masüba ajanga alima tsüngsang mopung tamajungba akumer, ta paisa shisem.
Pai teburtem danga shisaliok nung tetsürtem dang nungi tajungba akumtsü atema meranga azüngtsü ayongzük.
Paisa kaketshirtem dang Naga nunger mapa inyakba nung akhümket lir, anungji mapa kanga meranga inyaktsüla aser pei maitsü wazüka ayutsüla, ta ayongzük.
Iba sentong ya Zuthungbemo K Ngullie leniba nung agi aser Rev. Candid Sareo-i Tsüngrem temoatsü meshia sarasadema liasü.
Organizing committee convenor, Aaron Assumi-i lokti pelaa agizükba o jembi aser DNSU Tir, Kumlamo Patton-i Tir onük jembia liasü.
Kasa sentong nung Kekhwetsu Khutsoh, Head GB Diphupar aser Eno Imtiyapang, General secretary Naga Students Federation (NSF) nati jembia liasü.
Sentong nung Angami Students’ Union Diphupar (ASUD)-i ken ka aten aser DNSU-i shisaliok aser lenla balala nung Award angurtem nem tetushi aguja liasü.
Sentong nungsa shisalen sayur, Assistant Environment Engineer, Nagaland Pollution Control Board (NPCB), Er Aghali S Swu-i “Clean and Green: my environment, my responsibility” onük jembi, iba sülen tenangzükba agiba den signature campaign agi.
DNSU-i 2018-2020 kümsük atema office ketdangpur tasenpurtem Mongputeni/October 10 nü shima liasü. Tir tasenba, Pitovi Achumi aser Tongti tezülur, Grizel A Ngullie na leniba nung executive züngsemtem shimogo.