BJP-i meinyaktettsü aika nangzük

Anogo ishika tejaklen Union minister Nitin Gadkari-i TV sentong ka nung shilem agidang par sorkar atema tejak metentettsüsa tensa ka bentsür arua lir. 2014 küm parnoki meinyaktettsü tenangzükbatem agiba ajanga sorkar akümtsü tashi angu ta Gadkari-i ashi. Taoba general elections mapang BJP-i takok angutsü teimla tila ka dang liasü aser iba jagi parnoki election nüboyimdang nübortem atsür arutsü atema meinyaktettsü tenangzükbatem agitsü atema kecha marentak ta paisa ashi. “Assal Pavhane, Irsal Namune” ta ajaba comedy television show tasen ka nung Gadkari-i shilem agia liasü aser iba sentong ya October 5 nü Colors channel nung sayuogo. Sentong nung actor Nana Patekar-i Gadkari den semsaksemer aser idangji BJP-i tiyazü tenangzükbatem agiba osang Gadkari-i lemsatep. Nitin Gadkari ya indangindanga o jembiba nisung ka lir, anungji pai yimjak nung iba olen jembibaji shitak asütsü. Taküm August ita nunga Gadkari-isa sorkari mapa lemzüka yutsüba ajanga mapa magütsütettsü kechiyong linük nung mapa mali akümer ta jembiba ajanga par sorkar nüma metangtettsüsa tensa ka ajuru. 2019 general elections nung rangloker BJP-i mapa manguba onük ya tongtipang yimten onük ka kümdaktsür jembia aruba mapang Gadkari-i iba olen jembi. Ajisüaka, Gadkari-i dang masü saka BJP national president Amit Shah-ia 2014 election mapang nüboyimdang tiyazü tenangzükba agiba indang kuli agütsüogo. ‘Onoki bank account shia nung sen lakh 15 enoktsütsü ta nangzükba tu tiyazü liasü’ ta Amit Shah-i ashi. Centre-i ‘minimum government, maximum governance’ tangatetba nung inyaktsü nangzük saka basic service ajak nung Aadhaar kechi südir süaka alitsüla ta sorkari mapa inyakba ajanga iba tangatetba tangatetbaji tiyazü dang asü. Centre sorkarisa ‘Sabka saath, sabka vikas’ (külemi inyaktsü, ajak inloktsü) ta asüba yimyim ayimoktsü saka BJP-i sorkar yimsü asüba state aika nung nashi anükba teloktemi ozüng alema mapa inyakba ajanga iba yimyim jia amajok dang asü. Narendra Modi-i aniba sorkarisa bendanglen sen lakh crore 15 mima yua aliba bener arutsü ta ser demonetization mapa inyak saka iba mapa ajanga tax agütsüba sensotem ang timtem ajuru aser nisung karbo sen melentsü atema noktakdang taküm sama. Tatem nung demonetization ya nüngdak maliba mapa ama ka dang asü kechiyong sen 100% nungi 99.30% tashi meyipa aru. BJP-i aniba NDA sorkari sensakertem aser makamaitertem atema bilemja inyaker ta Narendra Modi-i anir parnok lennir aikati jembir, saka külen reprangdangra kechisarena ajak nung jenjang tupet atur aser sensakertem o makamaitertemi mejembitetba timtem aser khuret ajurur. India nung tanü totzü jenjang tasaktiba kümogo aser opposition teloktemi anir tanga NGO aikati BJP-i aniba Centre sorkar dang totzü jenjang ajemtsü atema takhangba agüja aser mepishiaka, parnoki mapa kecha meinyaker. Totzü nung dang masü saka LPG (liquefied petroleum gas) nunga jenjang tujen atur. Atangji sensakertem aser makamaitertem atema aria bilemja aser temulung agüja inyakba sorkar ka asü nungbo asenoki tanü iba tia ya majurula, kechiyong jenjang ajemtsüba mesüra atutsüba tashiji sorkar ket nung lir saka parnoki iba tashiji mamshir aser parnoki sorkar senpong asüngtsü atema ang tuluba bilema inyaker. Sangküm general elections agitsü aliba dak rangloker joko telok ajaki nüboyimtsü tenzükogo aser talisa Centre nung aser state teimba ka nung sorkar tashi bena aliba BJP-ia mapa inyaktsü tenzükogo. Tesüiba mapang ama taküm-a parnoki aika nangzüktsü aser nangzüka arudar, saka Nitin Gadkari aser Amit Shah nati anir BJP lennirtemi kuli agütsüba ya retreta bilema asenoki tenangzükba ajakbo mamangtsüla aser suwar ama makümtsüla. 2014 küm Centre nung BJP-i aniba NDA sorkar kümteter küm pezü tashi sorkar ketdangsüa arudang parnoki linük koma ketdangsüa anir arur’ar asenoki jangjajangja nguogo, anungji asenoki iba ya tansütsü ama südakja taruba sorkar akümba mapa nung kanga dang kümdanga aser jungjunga shisadanga shilem agitsüla.