State Angh, BP Acharya-i Kohima nung aluyimertem den senden amen

Mongputeni/Oct. 13, 2018 nü Raj Bhavan, Kohima nung state Angh, P B Acharya aser pa kinüngtsü, Kavita Acharya na den aluyimertem aser ketdangsertem tangokba noksa nung angur. 

Kohima, Mongputeni/Oct. 14 (TYO): Mongputeni/Oct. 13 nikongdang Raj Bhavan, Kohima nung Angh-i benokba Outreach Programme dak sendakba nung Kohima district kübok aluyimertem den senden den chiyungba sentong ka repsema agiogo, ta ketdangsertem osang ka ajanga metetdaktsü.
Senden nung Kohima Farmer Producers Organisation (FPO) President, Keghaselie K Kuoku-i FPO-i inyaka aruba osang metetdakja liasü.
Pai ashiba ashiba agi, Kohima District ya block 4 küma lemsar lir aser yangji aluyimertem tajangzük angutsü atema Self Help Groups 85-i mapa inyakdar.
Kohima District Farmer Producers Organisation (FPO) nung aluyimer züngsem ajak agi parnok 1091 register süa lir aser iba ya Nagaland nung Cooperative Societies Act kübok register süa lir.
Mapang shia aluyimertem state adener tangaleni Exposure trip anir aoer, aser ibaji Department of Horticulture & Agriculture-i sponsor asür.
Küm shia benjungmong aser sentong balala nung FPO-i alu nungi züsentetba exhibition den sales sentongtem nung shilem agia arudar, ta pai ashi.
Taküm FPO nungi progressive farmers 18 nem Skill India mission kübok Central Institute of Horticulture, Medziphema nung modern nursery management indang training agüja liasü, ta paisa ashi.
2016 küm FPO-i Agriculture Department teyari agia Kohima nung Kohima District Level Women Farmers Forum Conference ayongzüka agiogo. 2017 küm nunga Horti. Dept. teyari agia FPO-i Kohima nung Nagaland State Women Farmers Conference ayongzüka liasü.
FPO President-isa Kohima District nung aluyimertemi timtem balala ajangshiba, talisa alu nungi züsentetbatem belenba (transportation) aser market nung ayokba dak sendakba timtem balala metetdakja liasü.
Paisa Angh-i Raj Bhavan nung Kohima District Farmers senden ayongzükba aser aluyimertem atema chiyung sentong ayongba atema pa dang pelaba metedaktsü.
Senden nung Agriculture Dept. Director, G Ikuto Zhimomi aser Horticulture Joint Director, Qhutovi Wotsa natia jembia liasü.
Agriculture Dept. Director-i, Angh-i Kohima District nung aluyimertem Raj Bhavan-i jaokba atema pelaba metetdaktsü; “Iba ama sentong ya Nagaland nung tang mezüng asütsü,” ta pai ashi.
Paisa aluyimertem dang, aluyimertem tajangzük angutsü aser rongsenkettsüng anasü agi ajangzüktsüsa welfare projects aika lir, ta metetdaktsü.
Joint Director, Horticulture-ia Angh-i mapatong balala inyaka state nung aluyimertem anepaluba atema palaba lemsatep.
Sentong nung jembidang Angh Acharya-i, North East State tem, talisa Nagaland nung aonsotsü lu balala ayimtsü atema tsüngsang mopung tapet agi moaja lir, ta ashi.
Paisa, Cooperative Movement ka nüngdaker, ibaji ajanga aluyimertemi züsentetbatem ayokba nung yaritsü, ta ashi.
“Züsentenertem aser talirtem tesendaktep junga mali. Aluyimertem senotsü anasü agi ajangzüktsü atema organic aonsotsütemji inyakyim tapet ajanga ayoktsüla,” ta pai ashi.
Angh-i Pick-up van ka alitsü aser ibaji ajanga aonsotsü balala market-i bener aotsü atema FPO nem sen lakh 2 tenla agütsü. Kasa sentong nung aluyimertemi parnoki züsentetba chiyungtsütem Angh nem agüja liasü.
Sentong tetenzük nung Joint Secretary to Governor, George Abraham-i lokti pelaa agizükba o jembi, Raj Bhavan staff chinurtemi sobaliba shilem ka agi aser progressive farmer, Keviser-i ken ka tena liasü.