Assam nung lanur 5 khasetba atema Army 7 aitsür

Guwahati, Mongputeni (October) 14 (Agencies): Indian Army nung Summary General Court Martial (SGCM) kati Major General ka dena nisung tenet aitsüogo.
Küm 24 jakdang taila khatepdang nisung tepsetba ken o nung parnok aitsü aser parnok ajak taküm piyong tepuokdak ayutsü temerenshi agütsü.
1994 küm Assam kübok Tinsukia district nung taila khatepdang nisung tepsetba ken o nung Major General AK Lal, Colonel Thomas Mathew, Colonel RS Sibiren, Captain Dilip Singh, Captain Jagdeo Singh, Naik Albindar Singh aser Naik Shivendar Singh nungertem aitsüogo, ta Dibrugarh nung Indian Army unit-i Deobarnü osang metetdaktsü.
Taoba Assam Minister aser BJP lennir Jagadish Bhuyan-i ashiba agi, “February 18, 1994 nü Tinsukia district kübok tesem balala nungi Army-i lanur 9 apu. Süngolu nung ketdangser ka tepsetba atema temulung melemi bilema lanurtemji apu.”
Iba sülen anogo ishika lir Army-i taila khatepba otsü yanglur lanur 5 ULFA telungpurtem ta shia khaset aser tanüngba lanur pezüji chiok, ta Jagadish Bhuyan-i ashi.
Kasa küm February 22 nü Bhuyan-i Gauhati High Court nung Habeas Corpus petition ka benok aser iba nung pai lanurtem kong lir ta asüngdanga liasü.
Bhuyan-i benokba petition nung ajemdaker High court-i Indian Army dang anasatiba police station nung AASU (All Assam Students Union) lennir 9 anir arutsü tetuyuba agütsü. Ajisüaka, Army-i Dholla Police Station nung tasümang pungu bener arua sayu.
Taküm July 16 nungi court martial maparen tenzükba July 27 nü tembang. Aibelenertem nem temerenshi agütsütsübaji Honibarnü lemtet, ta Indian Army osang ka ajanga ashi.
“Ni asen linük indang judicial system aser Indian Army indang tangatetba tajung nung amanger” ta Bhuyan-i Summary General Court Martial indang oshidang pela agizüka ashi.