Hindu nunger tangateteribo Ayodhya nung tekülem ki meyangludaktsünütsü: Tharoor

New Delhi, Mongputeni/October 15 (Agencies): Election nung takok angutsü nükjidong nung taruba itatem nung mepetmesü adoktsüa akok, kechiyong sorkar tashi nung aliba party-i tamangba yimsü nung ajemdaker tensa raksadaktsütsüa akok, ta tanü Congress lenir aser MP, Shashi Tharoor-i ashi.
The Hindu Lit For Life Dialogue 2018 sentong nung ‘India: Issues and Opportunities’ onük nung Tharoor aser Gopalkrishna Gandhi na sensaksemdang taoba mapang Union Minister, Tharoor-i, “Taruba itatem nung mepetmesü atema asenoki renema alitsüla ta ni bilemer, kechiyong tamangba lokti nung ajemdaker tensa raksatsüa akok. Atangji ibaji shisabulutsüsa lir,” ta ashi.
“Hindu nunger timbakati Ayodhya ji Lord Ram asoba tesem lir ta amanger, Hindu nunger tangateter shingaia tangar tekülem ki (Muslim nunger Masjid) raksatsüba tesem nung Ram tekülem ki meyangludaktsünütsü,” ta Tharoor-i ashi.
The Hindu Lit for Life Dialogue & lecture series tasembuba edition nung tasüngdangba ka langzüdang Tharoor-i, Hindu nunger ka ama Hindu nunger timbakati iba tesem nungji Ram tekülem ki yangludaktsünütsü, ta ashi.
Taoba mapang West Bengal Angh, Gandhi-i, India nung tongtibang onük rongnung kaji, independent, autonomous institutions ya lir aser iba nungji lendong ajurudar, ta ashi.
Tharoor-i, “Temsüa dang lira Central institutions menden balala nung shimokba atema kecha ashishia mali. Ajisüaka item appointment aika qualification ji RSS den tesendaktep junga aliba lir. Tazüngba nung temsüa meliaka parnok office nung shimba atema tasüngdangba akar,” ta ashi.