PM Modi aser China Tir, Xi Jinping na taruba ita ajuruteptsü

New Delhi, Mongputeni/October 15 (Agencies): Ato kilonser, Narendra Modi aser China Tir, Xi Jinping na taruba ita Argentina nung ajuruteptsü, ta tanü Chinese ambassador to India-i metetdaktsü.
Tanü Afghan diplomats atema tang mezüngbuba Joint India-China Training Programme tenzüktsüba sentong nung jembidang Chinese ambassador, Luo Zhaohui-i, “Argentina nung G20 summit aliba mapang nung lenir ana ajuruteptsü,” ta metetdaktsü.
Taküm Chiteni/July ita nung Ato kilonser, Narendra Modi aser China Tir, Xi na Johannesburg yimti nung ajurutepa India aser China na tesendaktep tajungba akumtsü atema jembia liasü.
10buba BRICS Summit alidanga Modi-i China Tir ajurua liasü, aser ibaji ita pezü tsüngda tena asembenbuba ajurutepba liasü.
Taküm Rongchii/April ita nunga tena China kübok Wuhan nung anogo ananü tashi ajurutepa senden amen, iba sülen Aami/June ita Shanghai Cooperation Organisation (SCO) Summit senden alidang Qingdao yimti nung ajurutepogo.
Yimpoksüi/November 30, 2018 nungi Luchii/December 1, 2018 anogo tashi Argentina kübok Buenos Aires nung 13buba Group of Twenty (G20) senden amentsü, aser iba senden ya tang mezüng South America nung ayonger.