Tribal Brothers aser Meriema VYO semi-final-i iogo

Kohima, Mongputeni/October 15 (TYO): Tang tasayadak NSF asayamung tanü asaya koka Tribal Brothers, D. Khel Kohima Village aser Meriema Village Youth Organisation na semifinal-i iogo.
Tanü mezüngbuba asaya nung Tribal Brothers puri Monsang Students’ Union FC Manipur goal 4-1 agi akok.
Asaya nung Tribal Brothers puri mezüngbuba goal minute 9buba nung Keviphretuo ajanga idaktsü aser iba sülen Aloumei-i minute 23 aser 29buba nung goal ana idakja goal 3-0 aküm.
Lemon break sülen Monsang SU nungi asayar Ngamneirie-i minute 53buba nung goal ka idaktsü aser iba sülen minute 60buba nung parnok asoshi maongka tajung ka angu saka Kagali-i penalty metsüpeta liasü.
Maneni tribal Brothers nungi asayar Prem Kumar-i minute 74buba nung goal ka idakja parnoki asaya akok.
Monsang SU nungi asayar Augustine, Marconi aser Alower aser Tribal Brothers nungi asayar Akhobou, Sinlo aser Laiwang nunger nem asaya nung yellow card kaka agüja liasü.
Tanü QF asaya tanabuba nung Meriema VYO goal 2-0 agi Phesama Youth Organsiation kokogo.
Asaya mezüngbuba shilem tembangba tashi nung telok anapronglai goal ka danga magütsütet, saka asaya tanabuba shilem nung Meriema VYO nungi asayar Vizotuolie Lhousi-i minute 52buba nung aser Vikeduolie Lhousi-i minute 60buba nung ta goal ana idakja parnoki asaya akok.
Asaya nung Meriema VYO nungi asayar Khrieneituo Kezieo aser Kevirütuo Üsou na nem yellow card kaka agüja liasü.
Meriema VYO aser Tribal Brothers, D. Khel Kohima Village na Mongputeni/October 17 nü 1:30 ako nungi tenzüka mezüngbuba semifinal asayatsü.
Mongputeni/October 16 nü asaya yamai alitsü:
1. Centurion FC vs Kohima Eagles FC @ 12Noon
2. Saptiqa FC Zunheboto vs Senapati FC Manipur @ 2pm