29 Buba Delhi Ao Kaketshir Telongjem Fresher’s Day Among

Dimapur, Mongputeni/Oct. 15 (TYO): 29 Buba Delhi Ao Kaketshir Telongjem (DAKT) Fresher’s Day 13th Oct, 2018 nü Nagaland House, New Delhi nung kanga takok ngua mongogo; Iba sentong nung tongti tesemdangerji Wb. Imnatiba, Advisor Industries & Commerce, NIDC, Govt. of Nagaland liasü aser tongti O jembir Dr. Chubamenla Jamir, Asst. Professor, TERI School of Advance Studies liasü.
India yimtiba, Delhi nung küm shia asen Aoer kaketshirtem University, colleges aser institution balala nung azüngtsü aser training balala agitsü asoshi aser lanur company balala nung mapa inyaktsü jenti arur. Delhi nung asen Aoer kaketshir noklang pezü dak tema lir aser lanur mapa inyakertem, young professional (Public & Private sector) nung noklang ana dak tema lir. Parnok anepalutsü aser lenmang balala nung yaritsu asoshi DAKT ya kanga tongtibang tentet ka lir. Küm shia DAKT achayanga tasenpur pela-a agizükba sentong tajung ayonga amonger.
Tongti tesemdanger Industries & Commerce, NIDC, Govt. of Nagaland Advisor, Imnatiba-i ashiba agi, asen Aoer kin ji lenmang aisü nung temapur süa aruogo saka tanübo asen Aoer jenjang aser tia reprangdangra lenmang aika nung asenoki bendangertem memenepi kümogo; Tsüngremi meimba samatokogo, mapa meranga inyakba aser meranga azüngba to azülaa kümogo, ta shisem.
Tanü asen lima lanurtem zünger mapa mengutetba tia nung aika lir anungji azünger ta ser azüngtsüba masü saka shisaliok tajung den ‘tajung rongnungia tajungtiba’ akumtsü asoshi meranga azüngtsü pai ajungshi.
Iba den külemi pei dak aketba tashi aser sempet tem meteta tanger dak meimlai pei sasa inyaktetba aser bushiteta otetba lanur kaka asütsü pai ayongzük.
Iba den Delhi nung alidang education kisung bushiba dang masü saka lenmang tajung aika nguteta bener aruagi asen lima yanglutsü aser nübur tenzüka teyari agutsütsü aser asen lima tanger menepba anitsü pai ajungshia liasü.
Kasa sentong nung tongti O jembir Asst. Professor, TERI School of Advance Studies New Delhi, Dr. Chubamenla Jamir-i ashiba agi, tanü asenok kanga kara melenshiba lima ka nung alir. Takum libaliro (Life style), shishilembaba (market), rongsenkettsüng (Economy), tazüngba (Education) aser alima tzü mopung melenshiba (Global climate change) den anogo shia mapa (Job) balala melenshiba putu nung asenok alir, anungji kaketshir kati iba putu den sütepba azüngtsü, litettsü aser shisatsü tasen ngutetba lanur kaka asutsü ayongzük.
Iba den külemi lanur kaji tanger jilu repranger kaketshir ka masü saka pei sempet metetba lanur kaka asutsü lai ayongzük.
Tanü lanur kaji mapa bushir kaka masü saka tanger nem mapa agutsütetter lanur kaka süa nükjidong tongtetba lanur asütsü laisa ayongzük.
Kaketshir tasenpur tenüng nung Sp. Temshimeren Longkumer-i jembia liasü.
Iba den külemi Delhi Ao Senso Telongjem, Delhi Ao Baptist Church aser nübur balalai sentong nung shilem tajung balala agia sentong kanga meraketa mongogo.
Iba sentong nung Kaketshir parnok ajak agi noklang asem (300) dak tema arua adenba den ano Delhi nung aliba Aoer kibongtem, anükapang, Delhi NAP Aoer telongjem aser tembar tinotem jenti arua jangratema among.
Sentong nung Tsüngremer temoatsü meshia aser tenüngsang agüja Wabong Supongchiten, Director, Divine Bridge Ministries ajanga sarasadema moatsü.