Oyster Mushroom tsünütsü atema state level training tenzükogo

Kohima, Mongputeni/October 15 (TYO): Oyster Mushroom tsünutsü atema anogo ananü State level training tanü Conference Hall, Directorate of Horticulture, Kohima nung tenzükogo; iba sentong ya Rashtriya Krishi Vikas Yojona (RKVY), Department of Agriculture, Cooperation & Farmer’s Welfare, GoI kübok Horticulture Department-i ayongzük.
Okila jembidang Asst. Horticulture Officer (RKVY), T. Eluba-i, konger tapu 2300 aser genre tapu 200 lir aser tapu 2300 nungjagi tapu 12 bo tachila konger lir, aser itemji tsünütsütettsü akok, ta ashi.
Paisa, Mushroom technology ya 1960s mapang nung India tonga liasü aser 1970s tomlen nungibo linük nung tsünü tenzüka liasü, ta ashi. Nagaland nunga Mushroom technology ya 1990’s mapang nung atong, ajisüaka tang tashi nungbo tajangzük kaa metsünüteter, kechiyong iba technology tenzüktsü atema sen aika nüngdaker, ta paisa metetdaktsü.
Sentong nungsa Horticulture Deputy Director, Meyasashi-i power presentation ajanga Oyster Mushroom tsünüba tasa, Post-Harvesting handling of Mushroom, Mushroom tashidak balala den mesen anepaluyim aser ‘spent mushroom substrate’ agi organic manure küma amshiba indang metetdakja liasü.
Paisa, kongerji süngdong mesüra ‘elasticity’ aliba saw dust, mendi-küp, am-tou takong, mou takong aser azüngken tou ama nung tsünütsü akok, ta ashi.
Paisa, alima nung kanga kera ainba organism rongnung konger densema lir, aser iba chiyungtsü nung high quality protein, low cholesterol, selenium, dietary fibre, potassium, vitamin B1, B2 &D, low calories, fat & sodium den aser immune system nung yariba den AIDS virus tepsetba anti-oxidants lir, ta ashi.
Mezüngbuba anogo nung districts trok- Peren, Kohima, Dimapur, Mokokchung, Tseminyu aser Wokha nem training agüja liasü aser tanga district tem nem Mongputeni/October 16 nü training agütsütsü.
Iba sentong ya Deputy Directorate of Horticulture, S. Senka Jamir leniba nung agi, Angab aser par medemertemi ken ka aten aser Peren district nungi konger tsünür, Akeina Gonmei-i lai takok ngua konger tsünüba indang lemsatepa liasü.
Sentong nungsa konger tsünürtem nem Pawns aser Equipments agüja liasü.