Mkg nunga tetsür aluyimertem anogo nüngtem sentong ka ayonga among

Mokokchung nung ‘Women Farmers’ Day’ anogomong sentong takok ngua agir külen Award agizükertem, senotsü teyari angur tetsür aluyimertem den ATMA ketdangser aser sentong nung shilem agirtem külemi tangokba noksa nung angur. Mokokchung, Mongputeni/October 15, 2018.  

Mokokchung, Mongputeni/Oct. 15 (TYO): India linük ajunga den külemi Mokokchung nunga “Women Farmers’ Day” ta sür sentong tajung ka Mokokchung Municipal Council Shopping Complex nung ayongzüka mongogo; Iba sentong ya district administration akhüm nung Agricultural Technology Management Agency (ATMA) Mokokchung den Agri & Allied department-tem, Watsü Mungdang, NSRLM, NABARD aser SBI Mokokchung nungertem longjemer ayongzük.
Iba sentong ya tongtibangsa tetsürtemi aluyimba maparen balala inyakba ajanga lokti nem tajangzük bener arutsüba den parnoki meranga inyaker aluyimba maparen renlokdaktsüba nüngtem nung aser parnok nem akhüm aser tetushi agütsütsü ayongzükba lir.
Iba anogo amongba den külemi tetsür alu meranga ayimer parnok pezü nem ‘District Level Best Women Farmer Award’ agütsü. Parnokji; Maongkala (Chakpa, Chuchuyimlang Block), Chubatila (Mopungchuket, Kobulong Block), Limasungla (Ungma, Ongpangkong North Block) aser Bendanglila (Aosenden yim, Tsürangkong Block) liasü. Iba den ano tetsür telok meranga inyaker ka nem ‘District Level Best Women Farmer Group Award’ agütsü aser iba konang senpetji Longjem Self Help Group Aliba (Ongpangkong South Block)-i agizük.
Iba den külemi ano Satsü, Mangmetong, Satier aser New Camp nung alir tetsür parnok 18 nem ‘credit support facilities’ ta sür NABARD aser SBI Mokokchung-i Area Development Scheme (ADS) nungi senotsü teyari kar agütsü.
Sentong nung tetushi tesemdanger Mokokchung D.C, Sachin Jaiswal IAS-i jembidang, asen lima Industry tulu mali asünung, aluyimba maparen nung ajaki temulung agütsütsüla aser senotsü teyari agütsür telok balala nungi maongka agia meranga inyaktsü ajungshia liasü.
Tanü shirnokisa senotsü teyari agizükogo, parnoki nüburtem dang tatishitsü tajung sayuteta mapa meranga inyaktsü, paisa ayongzük. Sorkari aluyimba tsütsü temulung kanga agütsür, ajisaka nüburtemi sorkar sentong mangateti mapa junga meinyakra asenoki item maongkaji magitettsü, anungji Mokokchung district ya chiyungtsü talubosa adokba/anguba lima ka kümdaktsütsü asoshi merangtsüla, ta paisa shisem.
Iba anogomong den repsema tetsür aluyimertem atema shisatokden ka agia liasü. Iba senden nung shisalen sayur; Dr. Lanunochetla (Dy. DAO Mokokchung), S. Amarjit Mangang (Dist. Development Manager NABARD) aser Chinlianthang Ngaithe (Chief Manager SBI, Mokokchung Bazaar Branch) parnoki aluyimba maparen balala dak sentakba aser senotsü teyari angutsüba lenmangtem indang onük tajung aika bener arua lemsatep.
Iba sentong den külemi tetsür aluyimer kija aser telok balalai aonsotsü, süngjanglijang aser otsütsüset tapu balala bener arua MMC Shopping Complex nung yoka liasü.