MLA Azo-i PDA sorkar aitsü

Phek, Mongputeni (October) 15 (TYO): Neiphiu Rio lenisüba kübok PDA sorkari ‘temelenshi arur’ ta yimyim ayimoktsü aser asenoki temelenshi tajung bener arutsü ta bilem, saka tia maka temelenshi tamajungtem ang aruogo, ta MLA Kuzholuzo (Azo) Nienu-i ashi.
“Tanü Nagaland nung terenlok maparen anenogo, kaketshirtem scholarship mangur, old age pension mali, tesayur nem itasen magütsür, state ajungalen gari lenmang tia kanga mejungi lir, aputem chirepogo aser raksaogo saka sorkari yanglushitsü atema mebilemer” ta tanü Azo-i Phek Town Inter-Colony Tournament lapokba sentong nung jembidang ashi.
Nagaland state sorkari tasüngdangbatem langzütsü tsübur aser Assembly session nung opposition-i asüngdangbatem langzütsü mapang peria magütsü, ta paisa shisem.
Chief Minister-i MLA tem nem department in charge tashi magütsü saka asenoki shimtetba MLA tem denbo public temiang jenjang temaba nung mena lir. Iba ya temenünütsütsüka aser public-i shimtetba MLA tem ajembanga ayuba inyakyim ka lir, ta Azo-isa metetdaktsü.
PDA-i VIP sobaliba agientsü indang kanga jembi saka advisor aser chairman aika shimba ajanga ibaji amajok kümdaktsü, aser iba atema state senpong nungi sen crore aika endoker. Asen lima nung tesasatsü aketba temelenshi ang bener aruogo, ta Azo-isa ashi.
“Tsüngremi dang mulungra Nagaland nung yimten tensa yakta melentsü. 2019 nung BJP-i sorkar akümtsü tashi anguyonga mesüra manguyonga, NPF party-i pusemer teimba asütsü. Iba atema party züngsem ajak akangakanga noktaktsü aser aremzüka atatsü ayongzüker” ta paisa shisem.