Governor-i kaketshirtem nem tenüngsang agütsü

Dimapur, Mongputeni (October) 15 (TYO): Tawa IIT Guwahati nung Techniche Science Fair alidang “Best Project of the North East” sempet angur aser Entrepreneur Associate Innovation grant fund (2018) takok angur nem Nagaland Governor PB Acharya-i tenüngsang agütsü.
“Best Project of the North East” ya Kohima Science College kaketshirtem- Zenwang Konyak, Menthsoju K Mongzar, Khrade Veso aser Pushi P Khiamniungan nungertem angu.
October 15, 2018 nü Raj Bhavan Kohima nung Kohima Science College Principal, Dr Lily Sema aser kaketshirtem den sensaksemdang Governor Acharya-i kaketshir teloki Gynotox Botanical Pesticide Project yangluba atema tenüngsang agütsü.
Gynotox Botanical Pesticide Project ya süngolio, naro ama nung mesen ajema kümdaktsütsü atema yangluba lir.
Acharya-isa kaketshirtem dang meranga azüngtsü aser tarutsü nunga takok mapatem inyaktsü atema ayongzük.
College nung Principal, faculty aser staff temi kaketshirtem ajungmesoba aser yariba atema Governor-isa pelaba metetdaktsü.