Women Farmers Day Kohima nung amung

Dimapur, Mongputeni/October 16 (TYO): Agricultural Technology Management Agency, Kohima-i ayonga Mongputeni/Oct. 15 nü ATMA conference hall, Kohima nung Women Farmer’s Day (Mahila Kisan Diwas) mungogo. Iba sentong nung o jembidang Chiephobozou SDAO, Seyievono-i ashiba agi, state nung aluyimba maparen shilem 70 bo tetsürtemi inyaker. Tetsürtemi aluyimba nung shilem tajung agiba ajanga sensak tia nungi nüburtem anitetogo. Lai, aluyimer tetsürtemia teburtem ama inyaktettsü ta ashi, saka kasa mapang nung ayangba taa bendanga agütsüba aser ali senmang magütsüba sasaa bilemba lai lemsatep.
Laisa, aluyimba nung tetsürtem shilem sorkari jangjaa lir ta ashi aser tetsürtem atema sentong aser policy balala benoka aliba metetdaktsü.
Sentong nung Posanu Mekro-i SRI nung, Neilhouvo-i Sericulture, Rusile Khing-i Ngvu Logwa (FIG), Mesechu Kiewhuo-i süngolu ayimba, süngo yangluba yimya angazükba aser Neizonuo-i integrated farming tsütsü takok anguba indang lemsatepa liasü. Maneni sentong nung shilem agirtem dang chipo aonpo shidokba gel yangluba aser süngo atemba video tatsütsü sayua liasü.
Women Farmer’s Day sentong ya Rokoshuno Angela, Dy. PD (ATMA), Kohima lennisüba kübok aka aser blocks aser ATMA balala nungi tetsür parnok 32-i shilem agia liasü, ta DIPR sangdong ka ajanga metetdaktsü.