Mezüngbuba Dr. I. Longrizüng Trust Award Kr. Imliyala-i agizük

Imliyala Longchar-i 1st Dr. I. Longrizüng Trust Award agizüker külen Dr. I. Longrizüng kinungtsü Ongkiyala den par jala jabasotem, tongti tesemdanger M.B Longkumer aser sentong nung shilem agirtem den tangokba noksa nung angur. Mokokchung, Mongputeni/October 16, 2018.

Mokokchung, Mongputeni/Oct. 16 (TYO): Mezüngbuba ‘Dr. I. Longrizüng Trust Award’ ta sür konang tetushi agütsüba sentong ka Sangtennü yangi Longkümer Kilem Mokokchung nung meraketa agiogo.
Iba sentong ya Dr. I. Longrizüng Trust teloki ayongzük aser taküm iba Award-ji Longkhum nunger Wb. Tatongtsüba aser Wt. Toshikala na jala Kr. Imliyala Longchar-i agizük. Iba Award ya Longkhum nunger All India mesüra State JEE nung MBBS azüngtsü takok angurtem nem agütsür.
2006 küm Dr. I. Longrizüng sür külen par chirnurtemi iba Trust ya tenteter küm 12 lir külen, Kr. Imliyala-i iba Award ya mezüngbuba angur. Iba Award nung kuli kaket den sen 40,000/- dena lir.
Tanü iba sentong nung Senior Adviser MCCI aser Longpok Semchir Telongjem tir tsürabur M.Bendangnükshi Longkumeri tongti tesemdanger o jembidang, Dr. I. Longrizung ya tenentak, ammang sangwa memeteti meranga aser bendanga inyakba taküm ka liasü, pai nüburtem meima tenzük aser pa ya mangdang akaba nübu ka liasü, anungjiang pai nüburtem nungi akhüm tulu aazüktet, ta tenüng sanga ashi.
Pa mangdang akabayong, par chir doctor 3 tashi adokdaktsü, item rongnung kabo Health & Family Welfare dept. nung temaba menden tashi tongteta inyak aser tang par chir deacon teinyakdak 3 tashi arogo balala nung tenzükdaki, asen lima nungbo iba ama kibong aikabo malitsü südi, anungji, par kibong ya tatishitsü akaba kibong ka lir, ta paisa shisem.
Imliyalai iba senpet agizükba atema la nem tenüngsang agütsüba den meranga zünger Dr. I. Longrizung ama Tsüngrem akhümtsübua tatishitsü süa litetba doctor tajung ka akümtsü nükla yur nübur tenzüktsü asoshi paisa ajungshia liasü.
Dr. Longrizüng’er chirnurtemi nükla tulu yur iba ama sentong tajung atongtetba ajanga tarutsü lanur tajung aika adoktsü imlar, ta shia par kinungertem dang pelaba lemsatep.
Iba Trust ya Longkhum lanur kaketrijusangertem, asür Dr. I. Longrizüng akümli wadang tsüngnep nung anitaka jajanürtem ajungmesotsü nükla yur tentetba lir, ta par jabaso aser Trust nung Director, L. Mefutiba Ao-i ashi.
Trust inyakyim rongnung tongtibang tenüktelen kaji, yimtsüng nungi All India aser State JEE nung takok ngua MBBS azüngtsü ajungmesotsü nükjidong nung takoker nem iba Award ya agütsür, ta paisa ashi. Iba Trust ya iba Award asoshi dang masü saka, tanga wadang nunga Academic Excellence Award aser Special Award-tem agüja arudar, ta paisa shisem.
Iba den ano iba Trust ajanga tsürabur bilemteta aser pa akümli wadang inyakba tsüngsü nung nüngdakbapurtem asoshi free medical camp yimtsüng aser tesem balala nung mapang shia ayongzüka katsür, ta paisa shisem.
Asür Dr. I. Longrizung ya Rongchii/April 6, 1919 küm Longkhum yimdak aso. Pa ya Longkhum LP School, Impur Christian Middle School, Jorhat Christian High School, Calcutta University-tem nung schooling azüng aser Barry White Medical School Dibrugarh nung medical azüngbaji renem. Pa akümli alidang mapa tajung aika inyakba reprangteta – Vijay Ratba Award New Delhi, Certificate of Excellence New Delhi, Best Citizen of India Award New Delhi aser Gold Star Award London, item konang tulu aketba senpettem agizüka liasü. Par chir medical doctor asem tashi lir aser semchira 3 tashi medical graduate süogo.