ISI dang miim osang ayoker aika apu

Meerut, Mongputeni/October 17 (Agencies): Pakistan nunger Inter-Services Intelligence (ISI) dang miim osang ayokba dak sendakba ken o nung Meerut nungi Indian army ka apu aser kasa ken o nung nisung aika pua lir.
Army jawan ji army’s Signal Regiment, Meerut cantonment nung teinyakdak liasü.
Uttar Pradesh nung Anti Terrorist Squad-i sepai ka apubaji BrahMos spy case den sendaktepa ali asü maliar memetetdaktsü.
Kasa ken o nung Mongputeni/October 8 nüa scientist ka pua liasü. Nishant Pradeep Agrawal ji tesüiba küm pezü tashi Nagpur nung aliba BrahMos Aerospace Pvt Ltd (BAPL)’s missile research centre nung inyaka liasü, ajisüaka linük ashiokja Pakistan dang miim osang ayokba dak sendakba ken o nung pa puogo.
Osang angazükba agi, ATS-i Uttar Pradesh nung tesem aika mita ao, aser kasa ken o nung Agra aser Kanpur nunga nisung ana puogo.
Anogo ishika tejaklen UP Police-i sangdong ka ajanga, Pakistan nungi tetsür tenüng amshia Facebook accounts balala nungi India nung defence dak sendakba rejutem nung ketdangsertem mesüzüktsü meranger, ta metetdakja liasü.
Noida nung BSF sepaitemi nisung ka apuba, aser iba nisungbai ashiba o nung ajemdaker agency temi bushisüngdang tenzükogo.
UP ATS team-i Agrawal indang computer nung tashishitsü aketba osang kar nguogo. UP ATS team-i Agrawal indang computer nung tashishitsü aketba osang kar nguogo.
“Item osangji pa indang laptop nung malitsüla. Ibaji ajanga OSA ozüngtem sendoker, ibayongji pa puogo,” ta ATS-i metetdaktsü.