CJI Ranjan Gogoi indang taila Twitter account lapoksang bushir

Guwahati, Mongputeni (October) 17 (Agencies): Tawa Chief Justice of India inyaktsü shimsang Assam nunger Ranjan Gogoi indang taila Twitter account ka lapokba aser amshiba atema Delhi Police-i memetetba nisungtem anema FIR ka benokogo.
Bar & Bench-i report ka agütsüba nung Delhi Police indang Special Cell-i FIR ji benok. Taila Twitter account atema ken o tem benokba sülen parnoki FIR benok.
Additional Registrar of Security and Caretaking at the Supreme Court, Colonel GB Marwah-i mezüng police tsüngdang iba ken o benok.
Taila Twitter account nungji CJI Gogoi indang noksa dang amshiba masü saka tamshisang jagi social media ajanga ken o aika atema osang tiyazütem prokshir, ta Col. Marwah-i ashi.
Col Marwah-i iba ken o atema mezüng bushisüngdang asüdang Twitter account ji taila ta putet aser iba jagi pai Delhi Police indang Special Cell nung FIR ka benok.
Information Technology Act kübok onük balala nung ajemdaker Special Cell-i memetetba nisungtem anema FIR ji register asü.
Delhi Police-isa Twitter India dang taila account shibangtsütsü atema osang sangoktsüogo.
Osang angazükba agi, police telok kati aibelener aputsü atema bushisüngdanga arudang, lanur kati iba taila Twitter account lapoka amshiba bushitetogo.
Taoba mapanga iba kasa nisung yagi taila account tem lapok aser shibang. Iba nisungji Western Uttar Pradesh nungi mapa inyaker ta tsüngsü bushitetogo aser pa aputsü atema bushitepdar, ta osang ajangasa shisem.