Asenok jungkai adokba ajanga alir

Kong ainkar sayutsüngi mali, nübur tesoetba mali saka shibai ozüng benshir pa temoatsüba.  – A. Shin 29:18.
Alimaji mangdang agi anir. Tsüngremer nübur jungkai adokba ajanga alir. Alimai nükjitong aser alizüng atongtsü bushir. Nüburtemi tulutiba aser jangratemtsü temulung asütsü bushir koba asoshi parnoki parnok taküm yutsür. Institutionsi alizüng ayur aser ibaji tongtettsü asoshi parnoki tentet tentetter. Tsüngremer nüburi lemang balaka nungi inyaker. Khristantemi parnok taküm Tsüngrem jungkai adokba nung yanglur. Asenok tarutsü taküm asoshi kechi tajungtiba asütsü ta bilemer ta Tsüngremi asenok tebilemba masüngdanger. Pai asen nüngdak metetta kar. Tsüngremi asenok nungi aginübaji Pai Pa mulungjang nung aliba jungkai adoktsüba aser asenok asoshi Pai mulungba kechi lir iba nung asenoki temulung agütsüdaktsüner, kechiaser Tsüngremer lemangtemji asenok lemangtem masü! (Isa. 58:8-9).
Kodangsa nüburi pei taküm Tsüngremer jungkai adokba mamendaklir parnoki tazüokba ajak magizüker. Iba tetezü parnok nükdang kechi junger ta bilemer aji inyaker. Parnoki parnok alizüng ayur, parnok nüngdaktem yanglur aser Tsüngrem dang moajang ta sarasademer. Khristan karbo Tsüngrem nungi talangka pilar alir aji saka parnoki sarasademtsü jangrar aser Tsüngrem dang parnoki merangba nung moajang ta asüngdanger!
Na asoshi Tsüngremi mulungba lemang metettsübaji Pai ne dang jungkai adoktsübaji dang lir. Nai ibaji nai mulungba lemang nung kodanga mangutsü mesüra memetettsü. Kodang nai Tebu dang angashir, indangyongjisa ne taküm asoshi mapa kar: tashi angaba. Apijemtsü Shin züluri ashiba ama: “Shibai ozüng ayur pa tepelatsü.”