Mokokchung jila nung ‘World Food Day’ among

Mokokchung, Mongputeni/October 17 (TYO): Agricultural Technology Management Agency (ATMA), Mokokchung den Rotary Club, Mokokchung nati senteper ayongzüka yashi (Mongputeni/October 16) Mokokchung nung Mayangnokcha Government Higher Secondary School kaketshirtem den World Food Day 2018 anogomong mongogo, ta ketdangsertem osang ka ajanga metetdaktsü.
Iba sentong ya lanurtem melungjang nung linük nung chiyungtsü agi meperiba angatetdaktsütsü aser chiyungtsü lalushibong masütsü atema tangatetba agutsütsü nükjidong nung ayonga mongogo.
Chiyungtsü agi anüngba tongti kuli kaji, chiyungtsü lalushibongba ajanga lir, anungji lanur asüdangyongi chiyungtsü lalushibong masütsü atema angatetdaktsütsüla.
Iba dak sendakba nung kaketshirtem dang, chi auso ka atema aluyimertem kanga meranga inyakba indang angatetdaktsüba den külemi chiyungtsüji kechi nungi komaser angur, iba indangji angatetdakja liasü.
Aluyimertem kanga tajemba akumtsü tebilemtsü nung ajemdaker kaketshirtem dang aluyimba maparen nung ajemoktsü ajungshia liasü.
Iba sentong nung Technical mongin, Assistant Technology Manager, ATMA block, Longchem P. Sakotsungba Longchar-i school nung aonsotsü atsü (vegetable garden) anepalutsü atema practical tesayuba agüja liasü.
Iba dak alia kaketshirtem dang luli, beans, jibi aser coriander (tanya) tsünütsü atema tesayuba agutsü.
Kaketshirtem nem farm equipments, farm soil fertility inputs aser aonsotsü metsüh-a lemja liasü.
Mayangnokcha Government Higher Secondary School Principal, Sentinenla-i lokti pelaa agizükba o jembi aser Secretary, Rotary Club, Mokokchung, Allan Mark iba iba sentong okila metetdakja liasü.
Iba sentong ya Assistant Technology Manager, ATMA, Tsurangkong block, Ningshiyangerla Walling leniba nung agi aser Dy. P.D., ATMA, Mokokchung, Rongsennungla Imchen-i shilem agirtem dang pelaba lemsatepa liasü.
Iba sentong nung kaketshir 76 den ATMA aser Rotary Club nungi kedangsertem aser staff tem dena liasü.