3rd Padmashree W. Nokdenlemba Open V/Ball asayamung tenzükogo

Mokokchung, Mongputeni/Oct 17 (TYO): Padmashree W. Nokdenlemba nüngtem asayaba asembuba Open Volleyball Tournament Oct 17 nungi yangi Multi-Sports Complex Mokokchung nung meraketa tenzükogo. Iba asayamung ya 2012 nungi Ao Kaketshir Mungdang (AKM)-i kümsem nung khen ayongzüka akar.
Taküm iba asayamung nung telok tenet (7)-i shilem agitsü. Item rongnung Pool A aser Pool B ta küma lemsar asayatsü. Pool A nung Changtongya Volleyball Association (A), Waromung Sports Association Jangjanglong Club, Chakpa Students Union aser Young Spiker nungertem lir aser Pool B nungji; Sporting Club Lakhuni, Longsa Sporting Club Mokokchung aser Changtongya Volleyball Association (B) lir.
Iba asayamung nung tematiba takok angur nem tanga senpet densema sen lakh ka aser tanabuba jenjang nem sen 60,000/- aser semifinal nung tsüker telok ana nema sen 20,000/- (each) agütsütsü, ta angazüker. Iba asayamung ya Nagaland nungbo volleyball asayamung tulu rongnung ka asütsü.
Tanü iba asayamung tenzüktsür Chief Patron, BDO Imyapangla-i jembidang, asür Nokdenlemba ama lenla balala nung samanir ka nem akhüm tulu agütsüba den tarutsü lanu asenortemi pa tsüngsü mamatoktsü atema pa nüngtem iba asayamung ayongba asoshi AKM dang pelaba lemsatep.
Saisapong ya temulung agüja asayara, pei taküm jenjang ajungketba den külemi linük asoshia konang nüngsang bener arutsütsü lenmang sadema lir, anungji, achiajemba azüoka ajemalua, asüngteta aser meranga asayatsü asoshi laisa asayartem ayongzüka liasü.
Tayongertemi nükjidong tulu yur iba asayamung ya ayongzük asünung, teprangertem aser asayar ajaki yimya tajungtiba nung pei jakla azüoka shilem agia reprangtsü asoshi laisa shisem.
Nokdenlemba ya Waromung nunger aser pa ya Ao Kaketshir Mungdang (AKM) mezüng tir lir.