19th NSF Martyrs’ Memorial Trophy : Goalkeeper Medophrezo-i Meriema VYO final-i ani

Meriema VYO aser Tribal Brothers FC nungi asayartem mezüngbuba semi-final asayaba mapang tangokba noksa nung angur.

Kohima, Mongputeni/October 17 (TYO): 19buba NSF Martyrs’ Memorial Trophy tanü semifinal asaya nung Meriema Village Youth Organisation goal keeper Medophrezo Kezie-o-i penalty ana tashi kümzüka par telok final-i aniogo. MVYO aser Tribal Brothers Football Club na tanü SF asaya MVYO puri tie breaker ajanga goal 4-3 agi kokogo. Asaya minute 120 tashi asayaba sülen goal 3-3 nung asaya tembanga takoker jangjatsü asoshi penalty metsüteptsüsa aküm.
Asaya nung mezüngbuba goal Tribal Brothers nungi asayar Aloumei-i minute 19buba nung idaktsü iba sülen minute 37buba nung MVYO puri iba goal küptokteter lila saka Keneisezo Keditsu-i metsüba ball goal keeper Eshong-i kanga junga nokdanga liasü.
Lemon break sülen Tribal Brothers nungi asayar Laiwang-i par telok asoshi tanabuba goal idaktsü. Ajisüaka minute 67buba nung MVYO nungi asayar Vikeduolie Lhousi-i goal ka idaktsü aser minute 4 sülen goal keeper Eshong-i aibelenba maongka agia Kevingulie Ciesotsu-i tekolak agi ball goal nung tongokja score kasa aküm.
Atakzüker aliba asaya mapang tashi nung teloka kati danga goal magütsüteti arur mapang apuloktsü asayaba mapang tia maka MVYO defender Keneingutuo Yaotsu-i out throw asüba mapang mapang tali agiba atema referee-i tanabuba yellow card agüja pa asaya nungi tugudaktsü. Pa nem referee-i minute 26buba nung yellow card ka agüjatoker liasü.
Extra time asayaba mapang MVYO nungi asayar Vikedouolie-i minute 113buba nung par telok asoshi goal tasembuba agütsü aser goal agütsüba tepela nung tola semzükba atema pa nema referee-i yellow card ka agütsü. Ajisüaka Tribal Brothers nungi asayar Shürhosül-i asaya atemtsü minute anashi anunga lia goal ka idakja score maneni kasasa aküm.
Penalty shootout asayaba mapang MVYO puri ponguben metsüba nungi goal pezü idaktsü aser Tribal Brothers pur rongnungi Sanyem aser Sinlo nati metsüba ball goal keeper Medophrezo-i nokdanga liasü.
Tanü asaya nung Nagaland Commissioner, M Patton tetushi tesemdanger asü.
Mongputeni/Oct 18 nü 2buba SF asaya:
Senapati FC Manipur vs Centurion FC @ 1:30pm
Kasa mapang nung ASU aser NSF na exhibition match asaya Angami Students’ Union executives-i kokogo.
ASU-i iba asaya goal 5-2 agi akok. ASU pur atema mezüngbuba goal Avizo Lcho-i idaktsü aser iba sülen Tseituo Mere, Meguo Ratsa, Ruoko Shunyü aser Khrietuo Dahou nungeria goal kaka idaktsü. Dievi Yano aser Sikho Thou nati NSF pur atema goal kaka idakja liasü.