Nagaland nung Amur Falcon Conservation Week & Festival amungtsü

Kohima, Mongputeni (October) 17 (Agencies): Nagaland nung mezüngbuba Amur Falcon Conservation Week & Festival amungtsü atema renemdar.
Iba sentong ya November 8 nungi 10 tashi amungtsü.
Molulem (Amur falcon) ya küm shia South Eastern Siberia aser Northern China nungi Somalia, Kenya aser South Africa tashi kilometer 22,000 senzür, ta Outlook Traveller ajanga metetdaktsü.
Kümshia molulem ozütem Nagaland aser northeast India nung tesem kar (Assam kübok Umrongso aser Manipur kübok Tamenglong) nung anenzüker.
Wokha district kübok Pangti yimtsüng nung molulem ozü teimba anenzüker aser iba jagi Nagaland dang ‘falcon capital of the world’ ta-a ajar.
Amur Falcon Conservation Week & Festival ya taküm nungi kümshia amungtsü aser iba ya Amur falcon wazüka ayuba nung mera tulu ka agir ama asütsü.