Union minister MJ Akbar-i menden toktsüogo

New Delhi, Mongputeni (October) 17 (Agencies): Bodbarnü Minister of state for external affairs M.J. Akbar-i menden toktsüogo. Küm aika tejakdang pa journalist aser osangkaket yimozülur inyakdang tetsürtem dak tim mesüi jembishinüba aser inyaksangsemba atema tai tongloktsüba sülen Akbar-i tanü Minister of state menden yutsü.
Tetsür journalist aikati #MeToo campaign nung shilem ka ama arishi küm 67 Akbar anema ken o tem benoka lir.
“Ni okadak temeten angutsü atema telemtetba agiogo, anungji ni office toktsütsü tim ta ni angatet. Ni anema tiyazü onüktem benoka aliba den tokteptsü atema ni MoS for external affairs nung anenba shidi agütsüogo” ta tanü Akbar-i ashi.
“Prime Minister Narendra Modi aser external affairs minister Sushma Swaraj nati ni linük tenzüktsü atema iba maongka agütsüba atema kanga pelar” ta paisa shisem.
Akbar-i Delhi court ka nung journalist Priya Ramani anema tenüng menüktsüba ken o ka benokogo. Iba ken o ji Brihostibarnü Delhi nung angadangtsü.
Akbar-i Minister of state menden nungi anenbaji Priya Ramani-i pela agizükba metetdaktsü. “MJ Akbar-i menden yutsüba nung onok tetsürtem mulung süngzüker kechiyong iba ajanga pai aibelenogo ta asüba sayur. Okadak-a ni temeten anguba anogo kanga yongya atar” ta lai ashi.
Tetsürtemi Akbar anema ken o tem benokba sülen National Democratic Alliance (NDA) sorkar dang pa mapa nungi anenjang ta kanga rongshitsü tenzük. Mezüng iba ken o temai adokdang Akbar ainlen liasü.
Ajisüaka, Akbar-i pa dak tai tongloktsüba ken o temji tebilemba tamajung nung aser pa tenüng menüktsütsü atema lir ta meyiper aitsür.
2019 Lok Sabha election matongdang yimten tasa ka atonga inyakerba lir, ta paisa ashir.
Bharatiya Janata Party (BJP)-i iba onük atema ola madoki dang arur aser tang parnoki Akbar dang nungi pilaogo. Akbar BJP nung züngsem makümdang ken o tem ji atalok ta BJP-i ashir.
Akbar-i okadak ajanga pa tenüng kümzüka ayutsü atema inyakbaji pa tangutsü tim temeten ka lir. Party-i pa dak tai tonglokja aliba kulitem jangjatsü, ta BJP president Amit Shah-i ashi.
Tetsürtemi tebur tsüngdang timtem balala ajuruba atema ‘#Metoo’ movement’ nungi aruba ken o tem bushisüngdangtsü atema Women and Child Development (WCD) ministry-ia luden ka tentettsü ta osang metetdaktsüogo.
“Ken o shia nung timtem ajuruba aser khuret ajangshiba dak ni amanger. Mapa inyakdak teburtemi tetsürtem tim mesüi benshiba, jembiba mesüra inyaksangshiba asoshi maremzüktsü” ta taoba hopta luden ka tentettsü tebilemba lemsatepdang WCD minister Maneka Gandhi-i ashi.
BJP MP aser minister aikati iba tebilemtsü atema ola madoker. Ajisüaka, parnok lennir tejen kari minister-i menden toktsütsüla ta bilemer ta osang ka ajanga ashi.