Linük arrtsü kümzüktsü atema Technology amshitsü: Rajnath

Bikaner, Mongputeni/October 19 (Agencies): Tanü Union Home Minister, Rajnath Singh-i, India-i arrtsü security atema benoka inyakba technological solutions ajanga arrtsü anüktsü atema sepai menüngdaktsü, ta ashi.
Arrtsü security tashi aittsü atema sorkari comprehensive integrated border management system benoka inyaker, aser Jammu nung iba system kübok pilot project ka tenzükogo, ta paisa metetdaktsü.
Bikaner nung BSF security sepaitem den jembidang Rajnath-i, “Onoki atsü aliba tesem nung technological solutions amshiner, kechiyong atsüjibo mapang ka nungbo raksar. Ibaji ajanga arrtsü security terenemjem akümtsü,” ta ashi.
“Onoki ibaji inyaktsü, saka iba atemaji mapang agitsü, ajisüaka arrtsü kümzüktsü atema sepaitemi mapang ajak nung arrtsü anükba menüngdaki akumtsü,” ta paisa ashi.
Rajnath Singh-i, command aser control centre ka alitsü, aser iba nungjagi sepaitemi arrtsü nung atalokbatem tenük yoka reprangtettsü, ta ashi.
“Iba centre nungjagi sepaitemi arrtsülen bendangertemi telungi aittsü merangba reprangtettsü aser anasatiba arrtsü outpost nem iba osangji metetdaktsütsü,” ta paisa ashi.
Linük nüburtemi BSF sepaitem dak tamang kanga akar, ta paisa shisem.
“Linüki nenok akhümtsübuba meteta nenok ajungmesor. Kasa tanelaji ajanga Chandra Shekhar Azad, Bhagat Singh aser Khudiram Bose nungera linük nüchiso atema raratsü asoshi ajungmesoa liasü,” ta pai ashi.
Raraba hadir külemba ‘Shastra Pujan’ sentong tembangba sülen sepaitem den jembidang pai, kidanger linük (Pakistan)-i raraba hadir amshiba anenra asenoki raraba hadir amshitsü menüngdak, ta ashi.