Sabarimala ya Masjid raksatsüba tensa den mesükteper: Yechury

Thiruvananthapuram (Kerala), Mongputeni/October 19 (Agencies): Sabarimala mangatettep ken o dak sendakba nung CPM general secretary, Sitaram Yechury-i, Sabarimala atema longkak aitba ya Babri Masjid raksatsüba den mesükteper, ta ashi.
Yakünü Kerala nung iba tekülem lapokba mapang nungi tenzüka longkak sashia aitdar.
Iba tekülem ki telungtet nung tamangertemi longkak ait tenzüka liasü.
Osangbenertem den jembidang Sitaram Yechury-i, “Iba tesem jagi aoer TV crews- tetsür densema aika dak tim mesüi benshi. Iba tensa ya Babri Masjid raksatsüba den mesükteper. Volunteers kolak nung saffron bands mesüa lir, aser kasa süoshi sema lir,” ta ashi.
Paisa, “RSS-i inyakba ya asalentong junga yanglur inyakba lir. Sabarimala kishi lapokba ajanga RSS tamakok nguogo, iba tekülem kiji mapang shidak nung melapoktsüba ta asüba nunga parnoki tamakok nguogo,” ta ashi.
Tanep tetsür anati tekülem ki aliba tenem kolakji atong, ajisüaka Lord Ayyappa amangertemi sashia longkak aitba ajanga meyipa alu. Tetsür anaji Hyderabad nungi osangbener ka aser ka Kerala nungi activist liasü.
Tongti putir-ia tetsürtemji telung anir ira tekülem kiji shibangtsü ta shia liasü. Tetsür ana jagi tekülem ki telungjai aitsübasa, ta ashi, ajisüaka police-i mesüzüka tena meyipa yok.
Supreme Court-i tetsür tanur-tain ajak Sabarimala tekülem kidangi aitsü melatsü atema obendang agütsüba anema tamangertemi sashia longkak aitba nung ajemdaker Centre-i Kerala, Tamil Nadu aser Karnataka sorkar tem dang security akhangshitsü tuyuogo.