Liangmeijei asüba atema mangyimer

Kohima, Mongputeni/October 19 (TYO): Associate Press Secretary of Press Bureau, NPF Central, Mathew Rongmei tebu, Liangmeijei Paul Rongmei, Mongputeni/October 18 nikongdang Guwahati nung temelungjang tashidak agi asüba osang angashia jashia mangyimer, ta T R Zeliang-i sangdong ka ajanga metetdaktsü.
Asür Liangmeijei Paul Rongmei ya 1937 küm Chiteni/July 15 nü aso aser Holycross Parish, Dimapur nung Catechist ka ama tenzükba den külemi Zeliangrong Village, Dimapur nung aliba St. Francis of Assisi Church nung mezüngpur rongnung ka liasü. Pa ya Zeliangrong Village, Dimapur tenteter rongnung ka liasü, aser pa akumli mapang nung pai Dimapur nung Zeliangrong Village tentettsü atema ali tulu ka tenla agüja liasü; paisa Dimapur district nung Catholic Evangelisation nung shilem tulu ka agiogo, ta sangdong nung shia lir.
“Pa asüba ya Zeliangrong nunger atema takoksa tulu, aser tang ama mangyimba mapang nung kü den ozü kibongi mangyim lemsateper aser Tsüngremi mangyimer kibong züngsemtem aser sosem-tangsem ajak nem tesünepba tanela agüjang ta sarasademtsür. Asür tanela tesünep nung anisüngzükdakjang ta sarasademtsür,” ta paisa lemsatep.