Dr. I. Sentitemsü Imsong nüngtem nung Award agütsü

Mokokchung, Mongputeni/Oct 19 (TYO): Asür, Dr. I. Sentitemsü Imsong nüngtem nung konang tetushi agütsüba ‘Academic Excellence Award’ sentong ka Oct 18 nü Sangtemla Community Hall, Mokokchung nung meraketa agiogo; Iba sentong ya Asangma Senso Bendanglen Alir Telongjem (ASBAT) kübok Award Trust Board-i ayongzük.
Taküm iba Award ya Kohima nung alir Asangma nunger Wb. Rongsentemsü aser Wt. Alila na jala Kr. Chubakatila Jamir-i agizük. Lai 2018 nung NBSE-i agiba HSLC tatidang nung Top 18 jenjang ajangzüktetba asoshi iba konang senpetji la nem agütsü. Senpet sen 20,000/- den nüngo oset ka senpettsü.
Sentong nung tetushi tesemdanger Jt. Director, T. Lipok Jamir-i jembidang, tashitemetet, shisa taka aser tangatetba item yabo tebushirtemi dang angur, item ya mebushira mangur aser shirnoki zübazüba bushidir tera dang angutsü aser shirnoki nentaka aser meranga bushidir, parnoki iba yariji angutsü, ta ashi.
Kechi mapa nung südir süaka nentaka aser kümdanga inyaktsübaji kanga nüngdaker aser timtem melii tajangzük kecha mangutsü, anungji mapang shitak amshia, mangdang yur nentaka aser meranga inyaktsü aser azüngtsü asoshi pai ayongzük.
“Tsüngrem akhümtsübubaji shisatsü tetenzük aser shibai Pa peladaktsür, item pur nem Pai temetetba shisatsü aser tepela agütsür”, ta paisa Lai o nungi tatishitsü kar bener arua Tsüngrem meteta alitsü asoshi ajungshia liasü.
Asangma nunger asür Dr. I. Sentitemsü Imsong ya T. Imkong Imsong aser Alila Jamir na jabaso lir. Pa ya Naga nunger lanur scientist tajung rongnung ka liasü. Pai HSLC nung state rank 7 buba, P.U nung state rank 3 buba, B. Sc Physic (Hons) nung state rank 1st (Gold Medalist), M. Sc First Class aser Ph. D nung theoretical physics best thesis nung takok angu.
Pa ya University Siegen Germany, Ben Gurion University Beer Sheva Israel aser Institute of Mathematical Science Chennai item rijutem nungi onük balala nung Postdoctoral Fellowship (PDF) agi.
Pai 2006 küm president of India Medal for state topper in Physics (B. Sc) aser 2012 küm best Ph. D thesis in theoretical physic ta Award anaji agizük.
Pai India nung dang masü bendanglima tesem balala nung sentong balala aika nung dena aser angazüka jajaba nübo ka liasü. Pa 30th Oct, 2015 nung iba akümli nungi pilaa ao. Pa tanü asenok den meliaka alimai pa mapa teti bilemtettsüsa pai tsünep yuja lir. Pa ya alima shisatsü tulu metetba den Tsüngrem akhümtsübuba aser tatishitsü süa litetba lanur tajung ka liasü, ta pa otsü ajanga angazüker.
Iba sentong nung Asangma Village Council Chairman S. Temjen Imsong, Award Trust Board Chairman K. Toshi Lemtor, Ao Kaketshir Mungdang tir Imkongwati, Langpangkong Kaketshir Mungdang tir Imnakika aser tangartemia shilem balala agia liasü.