Arunachal nung ali melena sen crore aika agütsü

Itanagar, Mongputeni (October) 19 (Agencies): Indian Army-i ali agiba sülen küm 50 dak tema süia arur Arunachal Pradesh nung yimdaklirtem ali melen temenok nguogo.
Mapang talangka süiaka Centre-i ali atema sen agütsüba angurtemi tenük asüngba osang metetdaktsüogo.
Centre nungi ali melen sen angurtem rongnung teimba angusangji Prem Dorjee Khrimey lir. Pa ya West Kameng district nung Tukpen yimer lir aser pai sen crore 6.31 indang cheque angu.
Hokolbarnü Chief Minister Pema Khandu-i pa nem cheque ji amoktsü.
Tukpen yimtsüng anasa aliba Singchung yimtsüng nunga Phuntso Khawa nem sen crore 6.21 aser Khandu Glow nem sen crore 5.98 agütsüogo.
“Prime Minister Narendra Modi-i Arunachal meimba ajanga sen agütsüteter” ta CM Khandu-i ashi.
Singchung nungi nisung pungu nem ali melena sen crore 24.56 tashi agütsü aser Tukpen nungi yimdaklir tenet nem sen crore 13.17 agütsüogo, ta West Kameng district Deputy Commissioner Sonal Swaroop-ia metetdaktsü.
Sino-Indian war sülen 1962 küm Army-i aliji parnok tebou nunger dang meshi. China den arrtsü anasa tesep amenoktsü, lenmang aser aputem yanglutsü atema aliji meshiba liasü.
Sorkar melentepa arudang tatemtsü balala amer ali melen temenok magütsüi aru aser tesüiba küm 58 tashi süia arudang ali indang jenjang kanga ajungketadok.
April 2017 nung iba atema telemtetba ka agi aser Centre-i West Kameng kübok yimtsüng asem nungi kibong 152 asoshi sen crore 54 lemzüktsü. Iba sülen yaküm September ita ano sen crore 158 agüja liasü.