Mkg ISBT mapa akümtsü atema ita ana mapang agütsür

Mokokchung, Oct 19 (TYO): Mokokchung nung aliba Inter State Bus Terminus (ISBT) renemer joko küm tenet shi arur saka mapa küma maoba agi kümli adoker Khensa Village Council, Khensa Sensotsür Mungdang aser Khensa Kaketshir Telungjem-i ibaji ita ana tsüngda nung mapa küma inyaktsü asoshi Mokokchung Deputy Commissioner nem takhangba ka Oct 18 nü agütsüogo.
Mokokchung nung ISBT amenoktsü asoshi Khensa nungeri ali melar külen 2010 küm iba ya renem aser 2011 August ita taoba aser tang Nagaland Chief Minister, Neiphiu Rio-i lapoktsü. Iba ya lapoker küm tenet shi arur, saka tang tashi mapa küma/inyaka mouteter, joko iba ISBT ya lokti menen benshidak tesem ka ama dang küma odaki, ta parnoki züluba chitti nungji shia liasü.
2015 küm Khensa Kaketshirtem Telungjemi iba tebilemtsü atema ya district administration dangi chitti ka züluogo, aji dang masü, ano Khensa Village Council-ia sorkar bangdak pur dang tebang agi aiben iba atema ya tongtepa jembiogo, aji saka, tanü tashi mapa mekümteti lir, ta parnokisa shia lir.
Iba tesem nung timtem tulu kar matalokdang, “iba ya ita ana tsüngda nung mapa kümdaktsünür, iba takhangba ya mapang shitak nung mataloktsüra, onok yimsü aser sobaliba temzüng dak ajemdaker onok mulungka inyaktsü”, ta Khensa Village Council Chairman, Wb. Kilentoshi; Khensa Sensotsür Mungdang, tir Wt. Tiamenla aser Khensa Kaketshir Telungjem, tir Sp. Imliyanger parnoki Mokokchung D.C dangi züluba kasa chitti osangzülurtem nem agütsüba nungji shia liasü.