Nun posemer Father Kuriakose asü

Alappuzha/Chandigarh, Mongputeni (October) 22 (Agencies): Kerala nung nun ka dak tashiyim agi shi nung medemba atema tai tonglokja alisang Bishop Franco Mulakkal anema kuli agütsür Father Kuriakose Kattuthara Hombarnep sür lia angu.
Punjab kübok Dasuya nung Father Kuriakose ji tenla ki atongtepa aliba takdang ka nung sür liasü, ta par kinungertemi ashi.
“Arishi küm 62 tain Father Kuriakose ji St. Paul’s Church, Dasuya nung liyonga aru aser pa tanep pa indang taktang nung süchia orr lia angu. Pa mozü kidangi anir ao saka süadoker liasü” ta Deputy Superintendent of Police, Hoshiarpur, Daljit Singh Khakh-i ashi.
“Pa mang nung zübo kecha maliasü aser pa yipten nung saktsüba liasü. Pa anasa blood pressure indang mozü süngjang ka lia angu. Doctor temi postmortem agitsü aser iba sülen jiang pa asüba osang jangjatsü” ta Khakh-isa ashi.
Father Kuriakose’er kinungertemi Alappuzha District police tanishir S. Surendran tsüngdang ken o ka benokogo aser parnoki pa asüba jungjunga bushisüngdang asütsü atema takhangba agütsüogo.
Jalandhar diocese kübok Missionaries of Jesus nung nun ka pusemba atema arogo ketdangsertemi pa tanen makai amokmerena arur ta Father Kuriakose-i taoba mapang ashi.
September 21 nü Kottayam district kübok Kuravilangad police-i Bishop Mulakkal apu aser pa anema ken o ka benok. October 15 nü Kerala High Court-i tetuyuba tesashi kar agüja pa nem bail temelaba agütsü.
May 5, 2014 nungi May 6, 2016 tsüngda St. Francis Mission Home, Kuruvilangad nung aliba takdang ka nung Bishop Mulakkal-i la dak tashiyim agi 14 ben medem ta nun-i tai tonglokja lir.
Father Kuriakose tenu Johny-i pa tedi asüba nung tai apur. “Kerala arogo nung nun dak tashiyim mapa inyakba nung Kuriakose tongti kulisür ka liasü aser Jalandhar Bishop Franco Mulkakkal den sendaktepa alirtemi pa kanga rongshiyonga aru” ta Johny-i ashi.
“Franco-i tashiyim mapa inyakba ken o atema pa (Father Kuriakose Kattuthara) asü ta onoki amanger. Tai tonglokja aliba Bishop Punjab-i meyipa arudaktsüba ajanga pa timtem ajuru” ta Johny-isa shisem.