CBI telung nung ochi mashi ken o Rahul-i aitsü

New Delhi, Mongputeni/October 22 (Agencies): CBI-i ochi mashi ken o dak sendakba nung tongti ketdangser Rakesh Asthana aitsüba anema Congress tir Rahul Gandhi-i Tentonü tweet ka süa liasü.
CBI puti otsü nung tang mezüngbuba agency-i taoba hopta CBI special director Rakesh Asthana aitsüogo. Hyderabad nung amendaker aliba businessman Sana Satish Babu-i pa indang ken o ka nung teyari agütsütsü asoshi Asthana tenüng nung sübokrem sen crore 5 meshi ta ashiba sülen Asthana aitsü.
“Tamajungba küma aoba Instition ka yongtsü nung rara adoka lir,” ta CBI-i ken o benokba sülen Gandhi-i tweet asü.
Asthana ya sorkari 2016 küm CBI nung aniok aser aikati pa CBI tekolakba akümtsü imlaa liasü. Gujarat cadre police officer ka ama Asthana-i Godhra train arongba lendong bushisüngdanga liasü. Iba mapang nung pa state Vadodara range inspector general of police liasü.
Asthana ya Luchii/Dec 2016 küm interim CBI director ka ama shim, koba opposition-i anema liasü aser iba sülen hopta pongu lir Alok Verma full-time CBI ama shimtsü asoshi pai pa menden azüngtettsü.
Gandhi-i pa ya PM Modi indang “blue-eyed boy” ta aja.
“PM indang ‘blue-eyed boy” Gujarat cadre officer, Godhra SIT fame, CBI-i No. 2 ama ait aser tang sübokrem agiba atema puogo. Iba PM kübok CBI ya yimden yimsüsüba tsütsü tangar ajembangtsü hadir ka ama amshir,” ta Gandhi-i tweet asü.
Asthana anema ken o benokba ya taoba Mongputeni/Oct nungi CBI director Alok Verma den mangatettep adoka aruba dak sendaka lir ama reprangteter. Gujarat nung amenoka aliba company Sterling Biotech nung pa tenüng züngoksema aliba ngutetba sülen Verma-i pa promotion sota ayutsü merang.
Iba sülen tena tsüngda internal transfers aser ken o asadangba tsütsü mangatettep adoka aruogo
Verma-i bushisüngdangba ken o tem nung Asthana-i teka jushir ta shia pai cabinet secretary Pradeep Singh dangi Luroi/Aug 24 nü tashishiba agütsüogo.
Kasa mapang nung Delhi Chief Minister Arvind Kejriwal-ia sorkar aija CBI ya linük asoshi maksütsüka kümdaktsüogo ta tweet asü. Aam Aadmi Party tekolakba Kejriwal ya Congress anemer ka liasü aser pai dang BJP-i Congress ajatetogo ta ashi.