Temeshiba metsü prokba

Saka temeshiba prokeri chichiba sempet angur. A.Shin 11:18b
Asenok taküm kümzüka alitsü lemang aika lir saka temeshiba asoshi asenok sasa bendanga agütsüba nung sempet tulu agütsüba danga lemang kecha nunga mali. Asenok jenjang ajak Tsüngrem temeshiba sayutsüla aji tekümtet ajanga asenok meyong lir: asenok tebilemba temeshiba asoshi bilemba asütsüla, idangji asenoki kechi bilemer aji Tsüngrem chir asoshi mapet masütsü; asenok mapa, indangji asen takümi temeshiba Tsüngrem ka tenzüker ta kuli asütsü; asenok tsüngchiba, indangji asenok tesendaktep ajak nung shingai mashishitsü.
Ne taküm nung nai Tsüngrem temeshiba sayur asü? Temeshibaji nai ne taküm nung mapa inyaktsü melaba lir. Temeshiba bilemba metsü proktsü melen, nai tebilemba nung tamajungba aser temenen tebilemba indaktsür asü? Nai shi jangraba menokdangi mesüra tatok magütsütetba ne taküm nung lidaktsür asü? Yisui ashi asenok Tsüngrem aser Pa temeshiba tema bushira Pai bendenloktsütsü (Matt. 6:33).
Temeshiba metsü prokba nung sempet tulu lir. Tang nai ne taküm nung metsü proktsü sentong lir? (1 Peter 1:15). Ne tebilemba temeshi asütsü asoshi nai ne kolok nung temeshiba koda ayur? Na tsüngchir süa alitsü asoshi ne tesendaktep nung temeshiba koda arur? Asüng nai ne taküm nung temeshiba aluruba kanüra, tanü nai temeshiba metsü azüngtsüla.