Tanü Assam ghonda 12 mokdanger

Guwahati, Mongputeni (October) 22 (Agencies): Centre-i Citizenship (Amendment) Bill, 2016 agizüktsü telemtetba agiba anema October 23, 2018 nü Assam nung telok 42-i ghonda 12 mokdangtsü ayongzüka lir. Ajisüaka, BJP-i aniba state sorkari mapa inyaker ajak kechi südir süaka office-i aotsüla ta tetuyuba agütsüogo.
Sorkarisa shishilembartem dang mokdang posemra trade licences agientsü ta metetdaktsüogo.
Krishak Mukti Sangram Samiti (KMSS) tanishir Akhil Gogoi-i Honibarnü Assam nung telok 42-i October 23 nü Assam mokdangtsü telemtetba agiogo ta metetdaktsü.
Citizenship (Amendment) Bill, 2016 atema joint parliamentary committee-i Assam tanaben mesemdangi Home Affairs aser External Affairs ministry tem den ajuruteptsü sentong atongba atema Gogoi-i aitsü.
JPC-i asüng ministry anaprong nung ketdangsertem den ajurutepa senden amentsü sentong lir.
Külen, state sorkar nung yariteper telok- Asom Gana Parishad (AGP)-ia asüng Assam nung Citizenship Bill anema lokti sentong tulu ka agitsü ayongzükogo.
Centre-i Citizenship (Amendment) Bill agizükra, taruba panchayat elections nung AGP-i BJP den meyariteptsü ta taoba chief minister Prafulla Kumar Mahanta-i shiogo.
Assam sorkarisa November 17, 2018 nü Bengali telok 27-i Citizenship Bill posema Guwahati nung lokti sentong ka ayongba melidaktsütsü ta metetdaktsüogo.
Tanü Krishak Mukti Sangram Samiti (KMSS) advisor Akhil Gogoi-i BJP state president Ranjit Das dak tai tongloktsü.
Mokdang posemba telok ajak Ranjit Das-i amokmerener. Tanü Assam nung BJP-i tashiyim mapa inyakba ajanga Assam Movement mapang bilemteter, ta Gogoi-isa ashi.
“Assam nung tang aliba sorkari Hitler ama yimsü süa arur” ta paisa tai tongloktsü.
“Nisungtemi BJP-i amokmerenba hao ta mali. Assam nung alirtemi onok den yariteptsü aser sorkari inyakba mapa anema mokdangba nung shilem agitsü amanger” ta paisa metetdaktsü.
BJP president Ranjit Das-i lisopur teloktem mezüngmeshia jembiba atema tatok meshitsüla, ta Akhil Gogoi-i takhangba agütsü.
Paisa Assam nung alirtem dang October 23 nü mapai maotsü aser state kümzüka ayutsü atema mokdang nung shilem agitsü atema mepishia metetdaktsü.
Hombarnü Hill State Demand Committee (HSDC) aser parnok kongsang Karbi Students Association (KSA) den tanga sendaktepa aliba teloktemi asüng KMSS-i Citizenship (Amendment) Bill 2016 anema ayongba sentong nung yariteptsü ta metetdaktsü.
“BJP-i aniba sorkari pei senso nem maongka magütsüteter aser linük nung kin balala indang maitsü kümzüka meyuteter nung kodaser tanga linüktem nung arur nem senso agütsütsü. Centre-i Citizenship (Amendment) Bill 2016 agizüktsü merangba onoki anema noktaker” ta tanü HSDC general secretary Laichan Engleng-i ashi.