Pravin Togadia politics nung adener

New Delhi, Mongputeni/October 23 (Agencies): Taoba Vishva Hindu Parishad (VHP) lenir Pravin Togadia-i Sangtennü pa politics nung adenba metetdaktüba den 2019 Lok Sabha elections nung pa tokteptsüba party yakta sangdongtsü ta ashi.
Ayodhya nung merataket Ram temple ka yanglutsüba indang jembidang pro-Hindutva Antarrashtriya Hindu Parishad lenir-i temple yanglutsüba ken o dak sendakba nung nüburtem ahioktsüba atema BJP aitsü. VHP nungi mindokba sülen Togadia-i iba Parishad ya kümteta liasü.
“Ram temple yanglutsü nangzükertemi New Delhi nung parnok asoshi sen crore 500 alang office yanglutetogo saka Lord Ram bo maneni süki ka nung lidar,” ta pai Uttar Pradesh nung ashi.
Taoba Vishwa Hindu Parishad lenir-i ashiba agi, Hindu nunger anemba tashi tsükdaktsütsü asoshi pa 2019 Lok Sabha polls nung tokteptsüba atema mapang tongogo.
“Onok 2019 general elections nung tokteptsü aser onoki Ayodhya, Kashi aser Mathura meyipa agitsüba dak dang rangloker inyaktsü aser item tesemtem teti asoshi melenshitsütsü,” ta paisa ashi.
Paisa linük nung nütsüng arenba nokdangtsü atema ozüng benoktsü akhang. Par party telongjunga akümba sülen parnoki Muslim nunger nem minority jenjang agüja aliba agintsütsü, ta ashi.
‘Sankalp rally’ nung o jembiba mapang Togadia-i, pai pa tokteptsüba political party tenüng yakda sangdongtsü, ta ashi.
Hindu nunger dang pa den adentsü asoshi ajungshia pai nüburtem dang BJP pur merenshitsü asoshi ashi kechiyong parnoki Ram temple dak sendakba nung nüburtem ashioktsüogo.