Army-i Myanmar telung nung PLA telungpur 3 kahset

New Delhi, September 07 (Agencies): Myanmar nung Honibar aonung Army aser Assam Rifles unit senteper People’s Liberation Army (PLA) telungpur asem tepsetogo.
Manipur nung army osang ajanga ashiba agi, arrtsülen mita aoba mapang PLA telungpur asem kahset.
“Ozü sepaitem Myanmar telungi kilometer 2.8 ai aser sangwa lia parnok amak. Tasümang anabo onoki bener aruogo,” ta Army osang ka ajanga osangbenertem dang ashi.
Iba operation ji Assam Rifles 11th battalion aser 6 Dogra regiment nati agia liasü.
“September 5 nü tatalokbaji arrtsülen liasü. Ibaji alema onoki mao,” ta Delhi nung Army otongdar katibo jangjatsüogo.
Teloktep sepaitemji Manipur, Chandel district arrtsülen patrol oa liasü. Iba mapang nung Myanmar den arrtsü tesem nungji parnoki PLA telungpurtemji ajuru.
Parnok tsüngda ghonda pongu shi kahtepba mapang Major, Captain aser Lieutenant ka densema telungpur pongu tepset. Tasümang ana PLA telungpurtem jagi bener ao. Iba tatalokba sülen telungpurtemji ajen.
Army unit-i tasümang ana bener arubaji Moreh police station nung agütsüogo. Meitei nunger timba ser aliba PLA ya 1978 küm tentet aser parnoki Manipur nüjiso atema rarar.