Assam nung MLA Gopinath Das anema FIR benok

Guwahati, September 07 (Agencies): Assam nung arishi küm 14 tetsür chanu kati tashiyim amshia raksatsüba ken o ka agütsüba sülen Assam nung opposition AIUDF MLA, Gopinath Das anema FIR ka benokogo, ta Hombar nü police-i ashi.
MLA Das’er kidang yariteper tetsürla jagi Boko police station kübok Mandira outpost nung ken o benokdang, Guwahati nung August 29 nü MLA jagi pa gari telung nung la tashiyim amshia raksatsü, ta ashi.
Boko constituency nungi adoksang Das ya All India United Democratic Front party nungi lir. Police-i ashiba agi, tetsürla aser lar kinüngertemi Deobar aonung Das anema ken oji benoka liasü.
Iba sülen ken oji Boko police station-i belen, aser yangji Protection of Children, Sexual Offences Act, 2012 kübok ken o ka benok, ta Kamrup district Police Superintendent, Indrani Barua-i ashi.
Ajisüaka Gopinath Das-ibo, “tetsürlai benokba ken oji ni anema sentong tamajung yangluba lir aser khenyongi tiyazü. Ken oji benoker süra bushisüngdangba ajanga item ajakji tai ta kuli angutsü,” ta ashi.
Das-isa ashiba agi, tesüiba anogo ishika jakdang tetsürla jagi la osettsüset ajak bener par kidang nungi jena ao.
Iba dak sentakba nung tetsür tentettem, All Assam Students Union, All Rabha Students Union aser All Assam Koch Rajbanshi Students Union züngsemtem Boko Police Station kima adenshia MLA ji aputsüla aser temerenshi agütsütsüla, ta takhangba agütsüogo.