Mangkolemba New Model College atema lung azüngogo

Minister Temjen Imna Along Longkumer aser Advisor Dr. Longrineken nati Tzupaksa nung Mangkolemba New Model College indang lung azüngba lapoktsüdang agiba noksa ka angur.

Dimapur, Mongputeni (October) 23 (TYO): October 23, 2018 nü Higher Education & Technical Education Minister, Temjen Imna Along Longkumer-i Mangkolemba New Model College indang lung azünga yutsü.
Iba college ya Mangkolemba ADC Hq kübok Tzupaksa nung yanglutsü.
Tanü Minister, Imna Along-i o jembidang Law & Justice, Border Affairs, Treasuries & Account Advisor, Dr Longrineken nem tenüngsang agütsü.
Dr Longrineken-i yaritepba ajanga Khar village Council-i College Campus yanglutsü tenla agütsüba ali nung model college tasen yanglutsü mapa tenzüker, ta pai ashi.
Mangkolemba ajanga tzükong asem repranger saka nübortemi shisaliok nung temulung magütsüba ajanga asenoki tangar memenepi lir, ta Minister Imna Along-i metetdaktsü.
Mangkolemba temeket renlokdaktsütsü aser Naga nunger ajak ajangzükdaktsütsü atema iba college tasen lapoker. Anungji tzükong lennirtemi shisaliok nung temulung agütsütsü ayongzüker, ta paisa shisem.
Sentong nung Dr Longrineken-ia o jembidang “tanü anogo ya Mangkolemba nung alirtem atema kanga dang tongtipang anogo ka lir, anungji nübortemi iba mapatong ya pei indang mapatong ka ama bilema yariteptsü ayongzüker” ta ashi.
Maneni gari lenmang aser helipad mapatem kobi melii tenzüktsü, ta paisa shisem.
Iba sentong nung AKM President Imkongwati aser Khar Village Council-ia o jembi.
Model College tasen ya Phase II kübok Rashtriya Uchchatar Shiksha Abhiyan (RUSA) kübok lapoker. Khar yimtsüng litsü kübok ali acre 29 nung college Campus yanglutsü aser ita 24 tashi nung tembanga yanglutsü sentong lir.