CBI tongtii Rafale dak sendakba osang bushiba agi anentsü: Rahul

New Delhi, Mongputeni/October 24 (Agencies): Tanü Congress Party Tir, Rahul Gandhi-i, CBI Director Alok Verma-i Rafale ochimashi dak sendakba kakettem bushiba ajanga pa nem kangshia leave agutsür yok, ta aitsü.
CBI Director Verma aser Special Director Rakesh Asthana na tsüngda mepetmesü adoka lia tenaprong dak nungi tashi agienogo.
Rahul Gandhi-i twitter ajanga, “CBI tongti, Alok Verma-i Rafale dak sendakba kulitem bushia liasü. Pa nem kangshia leave agutsür yok,” ta ashi.
“Ato kilonser tebilembaji kanga jangjaa meteter, shirnoki Rafale onük nung ajemokdir agientsü,” ta Rahul-i ashi.
Ajisüaka Finance Minister, Arun Jaitley-ibo, Verma-i Rafale fighter jet ken o reprangnüba ajanga pa agien ta jembibaji tai, ta ashi.
Central Vigilance Commission-i benokba nung ajemdaker sorkari Verma aser Asthana na agientsü telemtetba agi, ta Jaitley-i ashi.
CBI Director agienba atema tanü Opposition-ia BJP aitsüogo.
Asthana-i sübokrem agi, ta tai tongloktsüba nung ajemdaker mepetmesü adoka aliba mapang ka nung Narendra Modi-i aniba BJP sorkari Verma agienba atema opposition-i BJP aitsü.
Congress party atema otongdar, Randeep Surjewala-i, “Modi sorkari CBI tashi amokbangtsü meranger. Mezülongi CBI tashi agienba tembangogo. Mapang ka nungbo bushisüngdangba tongti telok (CBI) akhümket aser tashi makai akumtsü atema Ato kilonseri inyaker,” ta ashi.
“Modi sorkar aser BJP-i CBI tim mesüi amshiba aser tongtibang ken otem bushisüngdangba nung timtem agutsüba ajanga mepetmesü adoker,” ta paisa ashi.
Aam Aadmi Party tongti aser Delhi Chief Minister, Arvind Kejriwal-ia CBI Director agienba atema sorkar aitsüogo.
Kejriwal-i, “CBI director nem leave agutsüba kuliji kechi? Koba ozüng kübok Modi sorkari bushisüngdangba agency tongti ka anema inyaktsüsa tashi angu, Lokpal Act kübok angu asü? Modi sorkari kechi miimbangtsü meranger?” ta asüngdang.
CPI-Marxist lenir, Sitaram Yechury-ia Twitter ajanga Centre sorkar telemtetba aija ibaji ozüng alema lir, ta ashi.
“Modi sorkari parnoki shimtetba ochimashi ketdangser ka anema bushisüngdangba ajanga ozüng alema CBI tongti agienogo, aser iba ya BJP bangdak lenirtem den tesendaktep alir ka kümzüka ayutsü merangba lir,” ta ashi.