#MeToo luden nung Rajnath, Sitharaman, Gadkari, Maneka nunger shim

New Delhi, Mongputeni/October 24 (Agencies): #MeToo campaign kübok ken otem reprangshitsü atema Narendra Modi-i aniba sorkari züngsem pezüi akumba Group of Ministers (GoM) luden ka tentetogo.
Iba luden nung tekolakji Union Home Minister, Rajnath Singh asütsü aser züngsemtemji- Union Minister tem- Nirmala Sitharaman, Maneka Gandhi aser Nitin Gadkari nunger asutsü.
#MeToo campaign kübok ken otem nung ajemdaker tang aliba ozüngtem junga benoktsü aser frameworks yanglushia tashi itshitsü atema parnoki tebilemba onüktem benoktsü.
Alima tesem ajungalen #MeToo movement ya mapa inyakba tesem nung teburtemi tetsürtem dak tim mesüi benshiba anema tenzükba mapatong ka lir, aser India nunga iba campaign kübok tetsür aikati tongtibang ketdangser aika anema ken o agutsüogo, aser parnok rongnung MJ Akbar-ibo minister menden toktsüogo.
Ajisüaka Akbar-ibo pai aibelena mali, ta shia pa nem mezüng tai tongloktsüla, senior journalist Priya Ramani anema pa tenüng menüktsüba asoshi ken o benokogo.