NPF ya Naga nunger tanüker ama lir: Dr. Shürhozelie

Dimapur, Mongputeni (October) 24 (TYO): Naga People’s Front (NPF) ya Naga nunger anükertem ama lir kechiyong party-i Naga nunger atema inyaker aser Naga maitsü tenüng nung noktaker, ta NPF President, Dr. Shürhozelie Liezietsu-i ashi.
Bodbarnü Central Office nung NPF Kohima Division indang shisatokden sentong ka nung jembidang Dr. Shürhozelie-i “NPF ya linük nung regional political party tejentiba rongnung tanabuba lir aser Naga lima nung kodamasüba tensa mapang tentet” ta nenshia metetdaktsü.
NPF-i Naga maitsü kümzüka ayutsü aser Naga nungeri Naga yimten tekaraba nung latetnüba atema inyaktsü, ta paisa ashi.
“NPF party ya tashi aginüba telok ka masü saka Naga nunger tejakleni anir aotsü atema tentetba telok ka lir. Tanü Naga lennir aikati Naga nunger yimten putiotsü amadokogo aser sen o tashi dang arshir. Ajisüaka, NPF-i teti Naga yimten tebilemtsü atema aser Naga maitsü kümzüka ayutsü atema inyaka arur” ta paisa shisem.
Naga lennir aikati Nagaland nung regional party tentettsü merang saka tera meyangi aser tangatetba melii election nung toktepba sülen samadok, ta NPF President-isa metetdaktsü.
Paisa NPF züngsemtem dang tangatetba shitak nung noktaktsü aser Naga nunger atema bendanga agüja inyaktsü ayongzük.
Dr. Shürhozelie-i party züngsemtem dang Tsüngrem mezüng südaktsütsü aser ochi nung noktaktsü ayongzük.
Sentong nung NPF Secretary General aser Rajya Sabha MP, KG Kenye-ia o jembidang, ECI nung register süa aliba regional party ji NPF dang lir aser ‘Naga’ ta asüba tenüng ya Naga nunger aser maitsü jangjatsür, ta ashi.
Tashi aser mapa aikati NPF raksatsütsü merangogo saka Tsüngremi teti ochi pokümer aser kümzüka ayur, ta KG Kenye-isa shise.
Anogo ka shisatokden sentong nung mendenji NPF Vice President CoB Kruzakie Kelio liasü, Kohima Division President Guonei-u Sirie-i tesentepertem pela agizük aser General Secretary CoB Khrielezo Bio-i anküp tepela o jembi.
Tanü NPF Kohima Division-i NPF President Dr. Shürhozelie Liezietsu aser NPF Legislature Party Leader TR Zeliang na lenisüba kübok anidaktsü bangzüngtep.
Taoba General Assembly election nung nübortemi NPF MLA 26 shimteta assembly nung nübo timtiba aliba telok kümdaktsüba atema dang kanga pelar aser maneni Naga nungeri party aser lennirtem nungittsü ayongzüker, ta NPF Kohima Division Resolution Committee-i metetdaktsü.
NPF Kohima Division-isa NPF MLA 26-i party nung aser lenisüba kübok masetshi noktakba atema pelaba shisem.
Parnokisa PDA sorkar dang parnoki nangzükba ama inyaktsü ayongzük aser talisa public atema Kohima-Dimapur Highway 4 lane mapa tekaraba nung inyaktsü metetdaktsü.
Resolution Committee nung züngsemsem, Convenor -Vira Lhousa, Secretary- Khriezenyü Chielie, Members- Khriezobeinuo Sanchu, Suosahie Sachü aser Makolie Suosahie.