Mizoram teloktemi Chakma candidates meshimtsü ayongzüker

Aizawl, Mongputeni (October) 26 (Agencies): Mizoram nung NGO Coordination Committee-i Hokolbarnü political party tem dang November 28 Assembly election nung Chakma candidate shinga metoktepdaktsütsü atema ayongzük.
Chakma nungerji “Bangladeshi foreigners” ta NGO Coordination Committee-i ashi.
Mizoram nung Chakma nunger 90,000 nungi 100,000 shi ka alir aser Mizo (Lushai) kin sülenbo parnok nütsüng yongsük teimba lir. Mizoram kübok south-western tsütsü parnok indang Autonomous District Council balaka tenteta lir.
Young Mizo Association (YMA) president Vanlalruata-i ashiba agi, Committee-i yaküm Assembly election nung Chakma nunger shinga meshimtsü atema tetuyuba agütsüogo.
“Chakma nungerji Bangladeshi bendangertem lir aser parnok Mizoram Assembly election nung tokteptsü temeten kecha mali” ta paisa ashi.
NGO Coordination Committee nung YMA den Mizoram Upa Pawl, Mizoram Elders’ Association, Mizo Women Federation aser Mizo Students’ Union teloktem dena lir.
Congress-i Chakma nunger candidate ana- Tuichawng nungi Amit Kumar Chakma aser West Tuipui nungi Nihar Kanti Chakma na shimba osang metetdaktsüba atema mepelar, ta Vanlalruata-isa shisem.
BJP aser opposition telok Mizo National Front (MNF)-ia Tuichawng aser West Tuipui nungi Chakma candidate tem shimtsü ta osang angazüker.
BJP-i Buddha Dhan Chakma toktepdaktsütsü akok ta imlar. Buddha ya Chakma nunger tongti lennir ka lir aser taoba hopta tu pai Congress toktsür BJP nung aden.
Chakma lisopurtem ya Arunachal Pradesh, Tripura, Assam aser Bangladesh kübok Chittagong Hill tracts nung alir.