MR Vaccination indang review senden amen

Kohima, Mongputeni/October 26 (TYO): Tang state nung tagidak Measles Rubella vaccination campaign jenjang asadangtsü atema Department of Health & Family Welfare-i ayongzüka Mongputeni/October 25, 2018 nü Conference Hall, Office of the Principal Secretary, Health & Family Welfare nung State Task Force senden menogo, ta ketdangsertem osang ka ajanga metetdaktsü.
Iba senden mendenbuba Principal Secretary, Health & Family Welfare, I. Himato Zhimomi-i State aser District Task Force den partners dang iba vaccine ajanga tanur ajak ayimjemtsü atema maneni meranga inyaktsü ajungshia liasü.
Paisa ketdangsertem dang MR Vaccination Campaign nung vaccine timtiba agutsüba district tem takok osang metetdaktsütsüla, ibaji ajanga tanga district tem ajungshitsü aser MR vaccination indang awareness agutsütsü, ta ashi.
Paisa tsürabur ajak dang iba vaccine indang junga rajema alitsüla aser pei chirnurtem ajangzüktsü atema iba maongka agitsüla, ta ayongzük.
Pai osangbenertem danga MR Vaccination osang maneni proktsü mepishia metetdaktsü.
Senden nung SIO-UIP, Dr. Atoshe Sema-i, vaccination campaign ji session sites tapu pezü- Educational Institutes, outreach sites, mobile/Special team aser facility based session sites nung agi, ta ashi.
Paisa, H & FW dak alia iba campaign nung yaritepba departments aser lokti tentettemji; School & Mass Education, Women & Child Development, Home Affairs, Information & Public Relations, Housing & Urban Development, Civil Aviation, Road Transport, Defence, Sports & Youth Services, Panchayati Raj, Canara Bank, Lions Club aser SBI lir, ta metetdaktsü.
Mongputeni/October 23, 2018 nü tashi nung Nagaland nung MRV vaccine campaign jenjang metetdakja pai, October 23, 2018 nü tashi nung state nung tanur 448504 iba vaccine agiogo, aser shilemji 76.62 asütsü; Dimapur nung shilem 66.14%, Kiphire nung shilem 91.13%, Kohima nung shilem 71.27%, Longleng nung shilem 96.88%, Mokokchung nung shilem 95.36%, Mon nung shilem 88.08%, Peren nung shilem 85.73%, Phek nung shilem 58.7%, Tuensang nung shilem 94.06%, Wokha nung shilem 80. 51% aser Zunheboto nung shilem 75.85% agiogo, ta metetdaktsü.
Kasa senden nung SMO, Dr. Sheila Longkumer-i, departments aser partners amalitepa inyakba ajanga anogo 20 nü tsüngda State nung atemzüka aliba nungi shilem 75 ayimjemogo, ta metetdaktsü.
Iba senden tenzüka MD, NHM-i okila jembia liasü. Kasa senden nung Department balala, UNDF, UNICEF aser tangartemi osang agutsüba sülen o lemtepa liasü.