Oct 29 nungi Nov 3 tashi NEC-i Vigilance Awareness Week amongtsü

Kohima, Mongputeni/October 26 (TYO): Nübur tenzükba wadang akhümket ajungkettsütsü aser loktiliba nung ochimashi malitsü atema North Eastern Council (NEC)-i inyakba dak sendakba nung parnoki küm shia Vigilance Awareness Week monga arudar; yamaji taküma Mongputeni/October 29 nungi Yimpoksüi/November 3, 2018 nü tashi parnoki “Eradicate Corruption-Build a New India” omen nung ajemdaker Vigilance Awareness week amongtsü, ta tanü ketdangsertem osang ka ajanga metetdaktsü.
Iba hopta nung Mongputeni/October 31 nü ya asür, Sardar Vallabhbhai Patel asoba anogomong lir, aser iba hopta nung ya Vigilance Awareness Week amonger.
Anogo pezünü Vigilance Sensitization programme tenzüka Mongputeni/October 29, 2018 nü NEC nung inyakertemi Integrity pledge agitsü, iba sülen Mongputeni/October 30, 2018 nü otsüno (essay) züluba tetoktepba agitsü aser Yimpoksüi/November 1, 2018 nü Cartoon/Poster yangluba tetoktepba agitsü.
Awareness week tembanga Yimpoksüi/November 2, 2018 nü tapet onüktem nung o jembitsü aser tetoktepba balala nung takok angurtem nem sempet agutsütsü.
Ochimashi anema raratsü atema tongtibang mapa kaji nüburtem nem awareness agutsüba lir, ta NEC-i züngshir.