Naga scientist 3 nem EAIF Award agütsü; Rio-i lanurtem dang shishilembatsü ayongzük

October 26, 2018 nü RCEMPA Hall Jotsoma nung Chief Minister Neiphiu Rio den MLA tem, EA ketdangpurtem aser takok angurtem agiba noksa ka angur.

Kohima, Mongputeni (October) 26 (TYO): Hokolbarnü Nagaland Chief Minister Neiphiu Rio-i Naga lanur asem nem mezüngbuba Entrepreneurs Associates Innovation Fund (EAIF) Award agütsüogo.
(EAIF) Award nung sen lakh 2 den kulikaket aser Entrepreneurs Associates-i küm asem angati mentorship dena lir. Entrepreneurs Associates ya 2000 küm tentet.
Kohima Science College Jotsoma (KSCJ) nung M Sc student aser lanur scientist Peihauding Zeliang nem ‘Organic Healing Paste’ aser ‘Bio-enhancer’ yanglutetba atema sempetji agütsü.
Maneni, KSCJ nungisa Bachelor of Science student Zenwang Konyak nem Umbrella Harvest yangluba atema sempet agütsü.
Sorkar mapa inyaker lanur Tsenshithung Yanthan-i Band Saw (portable sawmill) yanglutetba atema sempet agütsü.
RCEMPA Jotsoma nung sentong agidang Chief Minister Rio-i “alizüng tulu saka mapa tila süra, takok mangutsü saka takok angutsü atema kanga meranga aser tanen makai inyaktsüla” ta ashi.
Nagaland-i senotsü atema Centre sorkar dak dang metaloka lir saka asen rongsenkettsüng jenjang ajungkettsü atema asenoki lenmangtem bushiteptsüla ta Rio-i ashi.
“Asenoki yanglutetba products ajungkettsüla aser temaba jenjang atongtsü atema tila nungi tenzüktsüla” ta paisa shisem.
Yimtsüng tia nung aliba tesemtem nung bank maliba ajanga entrepreneurship tenzüktsü senotsü teyari mangur. Nagaland nung Rural Development block 74 aliba nungi 30 nug bank mali, ta Chief Minister-isa ashi.
Ano külen, khuret kaji Nagaland nung sen melena ali agütsüba khuret lir, kechiyong asenok ket nung legal documents mali. Iba atema state sorkari land laws salatsütsü atema telemtetba ka agiogo aser iba ya talisa tenemtsünglen asütsü, ta paisa shisem.
Paisa shishilembaba jangrar lanurtem dang jenjang dalang aser raw materials anguba tesemtem nung shishilembatsü ayongzük.
Ali kiburtem, kin hoho tem aser yimdaklirtemi ali reprangshimtsüla aser legal documents (pattas) yanglutsüla, ta Rio-isa ayongzük.
Sentong nung CEO & Coordinator of Entrepreneurs Associates & Group of Social Ventures, Neichute Doulo-i northeast nung purapitetba aser entrepreneurship indang onük jembi.
Item mapa inyaktsü atema senotsü kanga nüngdak anungji bank aser senotsü rejutem nungi teyari angutsü atema Chief Minister-i state government guarantee ka agütsütsü atema mapa inyaktsü mepishir, ta Duolo-isa ashi.
Iba ama mapa ajanga Nagaland nung Start Ups adokdaktsütsü aser Nagaland ya ‘Innovation Hub’ ka akümtsü. EA-i Nagaland ya Innovation Hub ka akümtsü atema inyaktsü aser iba mapa nung onoki sorkar teyari nüngdaker, ta paisa shisem.
Iba sentong agiba sülen tanabuba session nung Additional Chief Secretary Temjen Toy-i “The Nagaland Government’s perspective on innovation & entrepreneurship”; Team Leader EA Manipur Gopen Keisham Moses-i “The entrepreneurial truth about failure”, Model & Founder Cache Naga, Hobby Haven, Ketholeno Kense-i “Why I got into business and Fonder Ete Coffee Nagaland” aser Lichen Humtsoe-i “Creating opportunities in Nagaland: The story of Ete Coffee” onüktem jembi.