MCCI-i shishilembartem dang sangdonger

Mokokchung, Mongputeni/October 28 (TYO): Mokokchung nung shishilembar züngsemtem dang ozüng alema saru saruba magutsütsü mesüra tashishitsü aketba nisungtem nem tenla magutsütsü nenshia metetdaktsür, ta tanü MCCI President, Tsukti Longkumer aser General Secretary, Limalenden Longkumer nati sangdong ka ajanga metetdaktsü.
Iba dak alia jila nung dokan aser shishilembaba establishments dang calendar, concert, buffet tickets, lottery, raffle tickets malitsü metetdaktsür, ta sangdong nung shia lir. Tawa Mokokchung Municipal Council-i metetdaktsüba ama jila nung shishilembar aser dokan kiburtem ket nung MMC-i agutsüba Trade Permit alitsüla, aser sign board nung dokan tenüng den Trade Permit number zülua ayutsüla, ta MCCI-isa metetdaktsü.
Iba dak alia dokan aser business establishments ajak nung jana indokba pongdang alitsüla, ta parnokisa metetaktsü.
Shi aser ango stalls den restaurants nung tesütiba rate board ayutsüla aser staff temi apron mesüra tapet sübotsüla, ta MCCI-i metetdaktsü.
Yimpoksüi/November 5 nungi tenzüka mita aotsü aser aibelenertem dang senchi achitsü, ta parnokisa metetdaktsüogo.