Mangmetong Senso Telongjem, Kohima Golden Jubilee among

Kohima, Mongputeni/October 28 (TYO): Mongputeni/October 27, 2018 nü Regional Centre of Excellence for Music & Performance Arts (RCEMPA), Jotsoma nung Mangmetong Senso Telongjem Kohima (Kohima Mangmetong Union) Golden Jubilee “Beyond the New Horizon” omen nung ajemdaker mongogo.
‘Beyond the New Horizon’ onük nung ajemdaker jembidang Rev. Dr. Imchayanger-i, “Jubilee benjungmong ya asenoki tesüiba kümtem meyipa reprangshitsü mapang ka lir aser tesüiba mapangtem nung asenok tashimait aser aibelen reprangshia melenshitsü aser ibaji ajanga tarutsü nung asen nükjidongtem tongtettsü atema mangdang ayutsü mapang ka lir,” ta metetdaktsü.
Kasa onük nung ajemdaker pai, kodang asenoki tesüiba küm 50 ji meyipa reprangdanga tanü den medemdangdir asenoki temelenshi tulu den asenoki inyaktetba mapatem angur aser iba dak alia ano tuluba inyaktettsü atema mangdang ayur,” ta ashi.
“Asenoki tarutsüji melenshitettsü ta bilemtettsüla, kechiyong yashi asenoki inyakba ajanga tanü asenoki pelar aser tanü asenoki inyakbaji asüng atema lir, anungji tanü asenoki inyakba aser litetba ajanga tarutsü nung süngjang tajung tangtsür,” ta paisa ashi.
Lanurtem ajungshia pai, “Tuluka atemzüka inyaktsüji lanurtem mapa lir, kechiyong tanü limaji parnok atema aser taintemi inyaka toktsüba mesüra tang inyakbaji parnok atema, anungji lenirtem akumtsü atema nenok renemshitsüla,” ta ashi.
“Tanü lanur aikati nükjidong mesüra alizüng metongteter, ajisüaka tongtibangtibaji ‘tajungtiba akumtsübasa’, ta masü saka nü tajungtiba akumtsüla,” ta paisa ashi.
“Tsüraburtemi chirnurtem nem ki tajung, aben-süoshi aser anogoshia nüngdak balala agutsütettsü, saka aikati yimya tajungtem aser tanela chiyungtsü magutsür, kechiyong tsürabur aikati yamaji taküm meliteter. Yamaji tsüraburtem tamakok ngua tanurtemia iba tsüngsü nungji anidaker,” ta paisa shisem.
Tayongzükba o jembidang MLA Nagaland, Imkong L. Imchen-i, mapang melenshiba den tsüngsü medema asenok melenshitsü nüngdak, ta ashi.
Paisa, “Kodang asenoki tesüiba küm 50 meyipa reprangdangdir, asenoki temelenshi aika angur, aser kodang asenoki tang nungi tenzüka taruba küm 50 ji nüklai arudir asenoki ano temelenshi aika angutsü. Anungji ajaki mapang melenshiba den tsüngsü medema mangdang aser nükjidongtem melenshitsüla, ibaji ajanga asen lokti nung temelenshi alitsü, aser ibaji asenok longjemer amalitepa shisa lemsatepba ajanga dang ataloktsü,” ta ashi.
Kasa sentong nung Mangmetong Senso Telongjem Kohima nung mezüngbuba Tir, M. Nangshi Jamir, Goan Bura Village Council Mangmetong, Tekanungsang Longchar, Kohima Ao Union Tir, Chiden Yaden aser Er. Imsuyanger nungeria jembia liasü.
Iba anogomong nung Rev. Dr. Imchayanger-i Golden Jubilee Souvenir sayaja liasü.
Iba sentong ya Dr. Longri Jamir leniba nung agi, Mangmetong Senso Telongjem Kohima Tir, N. Tali Imchen-i lokti pelaa agizükba o jembi, Jubilee Planning Committee Convenor, Dr. Imtiwabang Pongener-i tepela anküp o jembi aser Imnalemla Jamir-i ken ka tena liasü.