Assam nung BPF-i maneni BJP den yariteptsü: Hagrama Mohilary

Batadrava/Guwahati, Mongputeni (October) 30 (Agencies): 2019 general elections nunga Bodoland People’s Front (BPF)-i Bharatiya Janata Party (BJP) den tesentaktep ayutsü ta Bodoland Territorial Council (BTC) tanishir Hagrama Mohilary-i ashi.
Nagaon anasa Batadrava nung 30 buba Bodo Sahitya Sabha Annual Convention amungdang Mohilary-i iba osang metetdaktsü.
Assam nung lisopurtem kümzüka ayutsü atema BJP-AGP-BPF teloktep ya tentet ta Mohilary-isa ashi.
Bodoland Territorial Council (BTC) tema nung aliba Bodo nungertemia BTC nung alirtem ama kasa schemes aser packages tajangzüktem angutsü, ta paisa shisem.
“Assam sorkari BTC tesem tema alirtem asoshi Bodo Council balaka tentettsü sentong lir” ta Mohilary-isa metetdaktsü.
Congress aser AIUDF teloktem tashi samaogo anungji 2019 elections nung BJP nem vote agüjang ta paisa ayongzük.
Annual Convention nung Batadrava MLA Angoorlata Deka, taoba Bodo Sahitya Sabha vice-president Bisheswar Basumatary aser Bodo Mahila lennir Bibharani Basumatary nungertem aden.
October 11 nü BJP-i sangküm Lok Sabha elections nung AGP aser BPF den teloktep ayutsü ta metetdakja liasü.
“Central leadership nungi tuyuba ama onoki Lok Sabha elections nung BPF aser AGP den teloktep meraksatsü” ta tawa tu Assam BJP president Ranjit Kumar Dass-i ashi.
2014 küm BJP-i Lok Sabha menden 14 nungi 7 nung takok angu. 2019 nung menden 12 nung takok angutsü imlar, ta Dass-isa ashi.