Hanuman Beniwal-i party tasen tentet

Jaipur, Mongputei/October 30 (Agencies): Independent MLA aser Jat lenir Hanuman Beniwal-i Tentonü Rashtriya Loktantrik Party (RLP) amenokogo aser ashiba agi, BJP aser Congress melena third front government ka atema inyaktsü.
“Onoki state nung nüburtem den ajuruteptsü aser onok nem vote agütsütsü asoshi asüngdangtsü aji ta asünungdang third front sorkar ka kümtettsü. Onoki nüburtem dang Congress aser BJP nem vote magütsütsü asoshi mepeshitsü,” ta Nagaur district kübok Khinwsar nungi MLA Beniwal-i rally ka nung o jembidang ashi.
Beniwal ya BJP ticket nungi 2008 küm adok aser iba sülen 2013 küm independent candidate ka ama Khinwsar nungi toktepa adok.
Bharat Vahini Party (BVP) tir aser taoba BJP lenir Ghanshyam Tiwari-i Kisan Hunkar Rally nung RLP pusemogo, kong Rashtriya Lok Dal (RLD) national vice-president Jayant Chaudhary densema liasü.
“Rajasthan nung temelenshi arutsü; BJP mesera Congress taruba election nung tasembuba jenjangi nongzüka yoktsü,” ta aluyimer, lanur aser Dalits tem den rally ka nung jembiba mapang Beniwal-i ashi. “Ni nüjiso atema Bhagat Singh shilem agidar aser Rajasthan nungi Congress aser BJP atsüngtoktsü atema ajak longjemer inyaktsüla.”
Pai ashiba agi, party anaprongla ochimashi nung densema lir. “Sensaker, Aluyimer aser lanurtem dak rangloker parnoki minyaker. Iba ya inyakyim meleshitsü atema rara ka lir. RLP temaitsü ya bottle lir aser iba ajanga temerek aser ochishiba sayur,” ta paisa ashi.
Rally nung jembidang Tiwari-i ashiba agi, “tang ya tashi tasen tenzükba mapang ka lir aser BJP o Congress pur anogo temogo. Iba sorkar yagi küm pongu tsüngda kecha minyak aser aluyimertem longkak aitdakja dang aruogo.”
Chaudhary-i, “tang sorkar kümteter aliba party ya aluyimer, lanur aser Dalit tem anema lir. Beniwal-i RLD pusemogo aser tang pa pusemtsü onok mapang lir,” ta ashi.