Delhi nung nija gari anishiba anendaktsütsü akok

New Delhi, Mongputeni/October 30 (Agencies): Environment Pollution Control Authority-i Sangtennü ashiba agi, linük yimtiba nung mopung menenba (air pollution) tamajungba küma ora nija gari tem mesenzüdaktsütsü.
“Delhi nung mopung menenba tamajungba küma maotsü imlaa atati, ajida mesera nija gari tem senzüba anendaktsütsüsa akümtsü. Public transport kija amshitsü,” ta Environment Pollution Control Authority mendenbuba Bhure Lal-i ashi.
Kidanger state tem nung motong arongba ajanga iba season, Delhi mopung Sangtennü tali menenba sülen iba tekümdangtsü ya agütsü.
Nikongtsütsü 3:00 ako nung Air Quality Index (AQI) ya 401 liasü koba ‘severe’ category-i aiter, ta Central Pollution Control Board ketdangsertemi ashi.
AQI 0 nungi 50 tashi ya tajung ta züngshir, 51 nungi 100 tashi ya ‘satisfactory’, 101 nungi 200 tashi ya ‘moderate’, 201 nungi 300 ya ‘poor’, 301 nungi 400 ya ‘very poor’ aser 401 nungi 500 ya ‘severe’ ta züngshir.
Centre-i achaayangba System of Air Quality Forecasting And Research (SAFAR)-i ashiba agi mopung menenba ya taoba ghonda 24 tsüngda motong arongba aser mopung aonba ajanga lir.
Sangtennü mopung menenba ya shilem 28 bo motong nunger amala arongba ajanga lir, ta SAFAR ketdangsertemi ashi.
Indian Institute of Tropical Meteorology (IITM) puri Delhi kidanger state tem nung satellite imageries ajanga biomass fire adokba tesem aika nguogo.
Smog ajanga linük yimtiba sübanga lir aser iba ya anogo ana tashibo memelenshi alitsü akok, ta ketdangsertemi metetdaktsü.