Kinü tanur ka koya agi metepba sülen asü

Darbhanga, Mongputeni (October) 30 (Agencies): Mongulbarnü Darbhanga Medical College and Hospital (DMCH) nung kanga dang taoksatsü lendong ka atalok aser ibaji intensive care unit (ICU) nung kinü tanur ka koya agi metepba sülen asüba lir.
Ajisüaka, Bihar nung mozü ketdangsertemi ashiba agi kinü tanurji temang mejungi akümba sülen asü.
Tsüraburtemi osangbener dang kinür tanur indang tasümang nung zübotem keta aliba sayu. Koya agi metepsaba ajanga zübotem nungi azü ayimba maneni liasü.
“Koyatem jagi pa indang tetsüng aser temeyong nung metep. Doctor temi zübo nung bandage enoka nembangtsü merang saka azü ayimba manen” ta tanubosang tebui ashi.
Anogo 10 tejakdang tanubosangji paediatric ward nung anepalutsü anioka liasü.
Tebui hospital ketdangsertem dak tai tongloktsü aser doctor o nursing staff merenshitsü atema takhangba agütsü.
ICU nung koyatemi meinprongbaji tang tasen masü saka koyai metepba ajanga kinü tanur asü ta asüba jibo tiyazü lir, ta doctor Om Prakash-i osangbener dang ashi.
“Kinü tanurji temulungjang tashidak tulu ka agi timtema aru. Pa asodang oxygen supply shitak magütsü aser iba jagi pa tekolok tasü ama dang liasü. Yamaji süaka, pa yangi aniokba sülen onoki akokba tashi pa yaritsü merang. Ajisüaka, onoki pa shia marudaktsütet aser tanep 4.30 meta pa asü” ta doctor Prakash-isa ashi.
Kinü tanur tsüraburtemi District Magistrate indang office nung ken o ka benokogo.
ICU staff-i tim mesüi inyakba anema ken o benokba bushisüngdangtsü atema telok ka tentettsü, ta Deputy District Collector (DDC) Kari Prasad Mahto-ia osangbener dang metetdaktsü.