Barak valley kaketshirtemi state balaka akümtsü akhanger

Silchar, Mongputeni (October) 30 (Agencies): Assam kübok Barak Valley ya balaka razüka aotsüla ta All Cachar Karimganj Hailakandi Students Association (ACKHSA) founder president Pradip Dutta Roy-i ashi.
“AASU, KMSS, AGP aser ULFA teloktemi Bengali aser Assamese nunger tsüngda rara adoktsüsa tensa ka bentsür aruogo. KMSS, AGP, AASU aser ULFA teloktemi inyakba mapa ajanga Assam nung Chief Minister inyaktsü atema minority lennir ka nem maongka agütsütsü. Iba nisungji tangar masü saka Badruddin Ajmal lir” ta Dutta Roy-i osangbener dang ashi.
Olemtep nung adenba ULFA telok nung lennir Mrinal Hazarika-i Bengali nunger anema jembiba atema sorkari mapa meinyaker, ta paisa sorkar dak tai tongloktsü.
“ULFA lennir Mrinal Hazarika-i Bengali nunger kidangi atutsü aser 80s mapang parnoi raraba ama tepsettsü ta jembi, saka state sorkari iba atema pa dak mapa kecha meinyaker. Ajisüaka, Subodh Biswas-i olen ka jembiba atema mapang talangka tepuokdak ayu. Iba ya kechi komala Assam lir?” ta Roy-isa asüngdang.
Guwahati nung Bengali nungertemi sentong agitsü memelaba atema paisa sorkar dang asüngdang.
“AGP-i Citizens Amendment Bill anema lokti sentong agir süra, kechiba Bengali nunger telok 26-i ayongba sentong magidaktsür?” ta Roy-isa ashi.
Deobar aonung Guwahati nung Shaan indang kenten sentong nung nisung kari Shaan mezüngmeshiba aitsür, ta paisa metetdaktsü.
Guwahati nung aliba Sarusajai stadium nung kenten sentong alidang nisung kati Shaan dak paper ball ka onloktsü. Iba atema tejashi nung Shaan-i ken atenba anen aser pa indang security nisungtem dang pa dak aonsangji sabangi anir arutsü tetuyuba agütsü.
“Iba ya kechi tangatetba’ar ni ratar. Asen Chief Minister-i Barak aser Brahmaputra lendentem sendakteptsü merangogo saka asenoki pa dak kobika imlatsü? Asenok pila nung dang ajungtsü. Barak Valley balaka razüka aobaji Barak aser Assam atema tajungba asütsü” ta Roy-isa metetdaktsü.
Congress party-i Citizens (Amendment) Bill atema noktakba osang jangjatsütsüla. AICC general secretary aser Assam in charge Harish Rawat-i iba osang metetdaktsütsüla, ta paisa takhangba agütsü.